- Lalhruaitluanga Chawngte
“Ka hril thiam lo, ka puang zo lo,
A ropui leh a mawizia chu;
Chhiarin hrethiam reng ila aw,
Nun pawh hlanin ka mawi e.”
Paho, patling, kan pian ve hma pawha vawi tam Krismas lo hmang tawhte’n rilru leh tih tak zetin, “Ka hril thiam lo, ka puang zo lo,” an han ti a.
A thenin kut an beng, a thenin kut an hum, a thenin ke an per, a then an bu nghat nghat, ban vai zauh zauh pawh an awm.
An tlangval laia zai tlaivar thin, thlasik laia zai chunga khawlai fang thin, Krismas a hnai a nih chuan tlaivar thak thaka zai tura ngai hmiah mai, tlaivara an zai pawha kham thei chuang lote an ni a, thlasik a lo thlena tlangsam par an hmuh changa “E!” ti rilru vawng vawng thin an ni. Zai tui tur an ni.
“Ka hril thiam lo, ka puang zo lo,” an tih lai te chuan hril thiam lo an inti tak tak a, puang zo lo an inti tak tak a nih tih an hmelah a lang a, an hril thiam loh, an puan zawh loh chu mawi hi an ti vawng vawng a, a ropuizia leh a mawizia hi sawi ngaihna an hre lo tih a chiang ngawih ngawih bawk.
“Aw, chu hmun chuan ka lung min len,
Thinlai hrui ang min rawn vuan e;
Si-ar leng pawh a liam thei lo,
Kawlkungah cham reng e,” an han ti leh a.
“Aw, chu hmun chuan ka lung min len…” an tih lai phei chuan an meng phal lo ang a, meng an awm a nih pawhin an maimichhin phal loh vang a ni ang.
“Thinlai hrui ang min rawn vuan e,” tiha sin fiah mawi em ema “eee” tia tenor ri, lo ri hlerh hlerh chu Pu Ramtiama aw a ni a, a soprano satu nulaho nena an han “vuan e” rual chu, mawi tak a ni.
Nuho hlei hlei an tui emaw tih tur a ni a, anni pawh an nulat laia zai tlaivar thin, Krismas hla sak kham ngai lo an ni tih a hriat e.
A thenin Nu Zopari hovin an alto a, an dar lehlam atanga shawl tla, uai deuh hnuang te pawh an siamtha hman lo. Anniho hi “alto” an la ni tak tak a, “contralto” hmaa pasal nei hman an ni. Engemaw zat an “air” a, an vanglai aw ang a ni thei tawh lo na a, nulaho soprano aiin an thiam mah emaw tih tur a ni. An phar diai diai a, lam ngai lo emaw kan tih te pawhin ban an phar fur mai. Banah pawh, haw kawngah Nu Tlani’n ka nu bulah, “Krismas ka hmang ta e,” a ti hial a, an bul vela an thiante’n “Kei pawh,” an lo ti sap sap bawk.
Chutiang karah chuan U Va’ltluanga’n ring mangkhengin a lo bass a:
“Amah fakin lawmin i zai ang u,
Khawvel buai leh sual thim chungah,
Rem leng rawh se, a zarah.”
A soprano satute’n “Amah fakin…” an tih zawha uluk em ema “Amah fakin, amah fakin,” a’n lo ti nghauh nghauh mai chu a ngaihnawm a ni mai lo, a hmuhnawm tel. Amah a fak tak tak tih hi a chiang a, chu chu a ni U Va’ltluanga zai tingaihnawm thintu chu. “Chhiarin hrethiam reng ila aw,” tih dawna “Chhiar” a’n ti, chuta a kuhva ei nawi rawn per deuh chhak te chu, a edit-tute’n a tihmuhnawm tura an tihper chawpsak emaw tih tham a ni!
Krismas hma chawlhkar hnih emaw a la awm tihah, Ningani zan leh Zirtawpni zanah kan ‘Kohhran Zaikhawmpui’ kan nei a, chumi zan chu khuang khat hla sak zan, a tuk zan chu khuang hnih hla sak zan tur a ni. Kan phur tlang a, nula thenkhat phei chuan an kawr thar an rawn ha der tawh! Tleirawl lam pawh an phur a, tlar hnung lama hmeichhe tleirawl rual zai tui an han insawi dial dial te chu thlifim thaw heuh heuh ang mai hian an ngainatawm. An hnunga thu, an rualpui mipaho chu hair cream nena Krismas an hman hmasak ber tur te a ni hlawm a, an phur em em. Khawvel buaiin a la tihbuai ve lohte an ni a, mahse “Khawvel buai leh sual thim chungah, Rem leng rawh se, a zarah,” tiin an tui em em tho.
Chumi hla sak zawhah chuan Pi Sangkhumi a ding hluai a, a tuk zan a nghak hman lo a ni ang, khuang hnih hla a thlang thut mai. Pi Sangkhumi te ho, zaikhawm neitu emaw an nih tih tur khawp hi an awm a, zaikhawmnaah an lan loh chuan an nuamsam lo tihna a ni ang tih tur khawp a ni. Chutiang khawpa tangkai chu an ni a, an thu pawh a tlang reng bawk.
Thu tawi han tih dawna tawi vak lo, mahse rin aia sei si lo a sawi a, “Thawktu a awm a nih chuan tlaivar mai tur,” tiin duhthawh takin a sawi a, chumi zawhah a hla thlan chu kan sa ta a ni.
Lengkhawm hlaah hlei hlei chuan kan tui emaw tih tur a ni; a hmaa lamte leh lam lote an lam suau suau a, “Khawvelah hian lal tam tak an lo piang ta a,” tiin, Lal Isua pian lai chanchin, Bible-a lang chin chu kimchang takin thluk neiin, ngaihnawm ti em emin kan puang rual ta dual dual a.