Aizawl: Doordarshan Kendra (DDK) Aizawl leh Industrial Development Bank of India (IDBI) te chu Mizoram State Policy Coordination Committee (MSPCC)-in thawhhona thuthlung, Memorandum of Agreement (MoA) a ziahpui.
Nilaini Planning & Programme Implementation Department Committee Room-a thutkhawmah MSPCC chuan DDK Aizawl chu sorkar flagship programme, Bana Kaih Policy tih changtlunna leh hmalaknate tlangzarhna kawnga thawhpui atan thawhhona thuthlung (MoA) a ziahpui a. Industrial Development Bank of India (IDBI) chu Bana Kaih Scheme hamthatna mipui tam zawk hnena a thlen theihna tura thawhpui atan MoA a ziahpui bawk.
He MoA hian thla thum chhung (January – March, 2026) thleng a huam dawn a ni.
MSPCC thutkhawm hi Dr. KC Lalmalsawmzauva, Adviser to Chief Minister (Handholding) chuan a kaihruai a. Mizoram sorkar Flagship Programme Bana Kaih felfai leh tha taka a kal theihna tura rilru leh ngaihtuahna senga hna pawimawh tak thawktu, MSPCC member-te hnathawh chu ropui a tih thu a sawi a. Mizoram hmasawnna rahbi pawimawh tak a ni tih hriain, theihtawp chhuah zel turin kalkhawmte a chah.
He huna tar lan a nih danin, Bank atanga report dawn angin, Bana Kaih Scheme Phase I hnuaia loan sanction tawh zat chu SBI kaltlangin 47, MRB kaltlangin 218 leh MCAB kaltlangin 39 a ni a. Phase II pawh kalpui mek zel a ni. He thutkhawmah vek hian Bana Kaih Scheme hnuaia CM Special Package Grant dilna 45 pawm nghal a ni bawk.