Aizawl: Home Minister K. Sapdanga’n nimin khan Champhaia ruihhlo do chungchangah Champhai SP Lokeshwaran R leh Addl. DC James Lalnithanga a kawm.
Champhai DC Conference Hall-a an inkawmnaah SP Lokeshwaran R chuan, Champhai district chhunga ruihhlo do kawnga an thil tum leh thil tih hrang hrang a sawifiah a, ruihhlo an man zat te, ramri an vil dan te, khaw hrang hrang an endik dan te a sawiin, mipui hnena inhrilhhriatna an neih hrang hrang leh ruihhlo laka fihlim tura zirtirna an neih te a sawi.
Home Minister K. Sapdanga chuan, police hnathawh chu tha a tih thu leh an taimakna fakawm a tih thu a sawi a, ruihhlo luh tamna district a nihna angin tha taka thawk chhunzawm zel turin a chah.
Minister hian DC Conference Hall a meeting a neih hnu hian, District Urban & Development Office tlawhin DUDO leh thawktute a kawm a, an hnathawh dan leh an hmalakna hrang hrang te a enpui a, CHANEM building hmunhma a fang bawk.