Aizawl: Northeast Frontier Railway (NFR) chuan Krismas pualin Guwahati leh Sairang inkarah Special Train a tlantir dawn.
Rajya Sabha MP K Vanlalvena’n hunpui laia mipui zin veivah awlsam nan Union Railway Minister Ashwini Vaishnaw a ngen angin, NFR chuan Guwahati leh Aizawl inkarah Special Train for Christmas pahnih, December 22-ah leh December 23-ah te Guwahati atanga Aizawl panin an tlan dawn a, rel pahnihte hi December 23-ah leh December 25-ah Aizawl atangin Guwahati panin an let leh dawn, coach 14 ve ve a awm dawn a ni.
December thla tir lam khan Rajya Sabha MP K Vanlalvena hian Indigo flight cancel a tam luattuk avangin Delhi leh India ram khawpui danga Mizo zirlaite leh hnathawka awm mi eng emaw zatin, Mizorama Krismas hmang tura haw chhohna kawngah harsatna a tawk mek a. Hei mai bakah, Manipura Zohnahthlak unaute’n an state chhung buaina avangin Aizawl hi Delhi leh India hmun dang kalkawng berah an nei ve tawh bawk si avangin, hemi harsatna sut kian nan Additional Train Service Delhi to Aizawl min pe turin Union Railway Minister Vaishnaw chu a pisaah hmuin a ngen a ni.