- Rinfela Zadeng
Bul tan tur hian tlâi luat a awm thei lo a; Pathian thu atang thlir phei chuan – a bul tan that aiin a tâwp khar that hi a hlu zâwk a nih kha. Pathian khawngaihnain kum thar, hun thar leh beiseina thar nen bul tana a tha zâwnga danglam thei turin hun kan la nei a. Chutianga danglama hmasawn tur chuan kum bul atanga bul kan tan hi a pawimawhin, a tâwpna pawh tha taka hlenchhuak tura kan rilru put hmang kan tihdik a pawimawh hle awm e.
- Mahni atanga bul tan
Mahni nun hmu loa mi dangte nuna buaia mahni inman loh hi migring ze pui a ni a. Chu chu Lal Isua, keimahni anga mihring famkim khan a hmu chiang em em a. Chuvangin ‘mahni mita khanchhuk awm hmu si loa unaute mita hmawlh te takte awm’ hmu lian thin kan ni. Chu kan rilru put hmanga chu keimahni atang ngeia kan thlaka kan danglam hmasak chuan mi dangte pawh an lo danglam dawn a ni. Chumi nei tur erawh chuan kan rin Pathian thu hi a taka nunpuia a zawmtu kan nih erawh a ngai a. Chuvangin Pathian thuawih, Pathian tih mi kan nihna atanga a tha zawnga danglam turin mahni atangin bul i tan phawt mai teh ang.
- Mahni hnaa rinawm
Mizoram Kristiante’n kan mamawh lian tak chu mahni hnaa rinawmna hi a ni awm e. Mi rinawm tak tak an awm rualin mi rinawm loh langsar tak tak te avang zawk hian buaina tam tak kan tawk thin. Sorkar hnathawk thenkhat inthlahdah tlat, a hun taka Office thleng thei lo, bân hma duh em em te hian kan ram hmel an ti bâl a. Hlawh kan lak tlai leh kan lâk hara phun nasa leh Sorkar nêp ti em ema seltu te hi, Sorkar leh mipui hian kan hna thawh mekah hian nêp min ti ve ang em? Hna kan thawh chhan lian ber hi pawisa a ni a, mahse mahni mihringpuite hnena rawngbawlna (service) a kengtel tih hi kan hriatchian nawn a tul hle mai.
Pathian pawh hian a zawng zawnga Amah ringa a thu zawm turin min phût a, mahse chutah chuan a tawp miah lo. A thu zawmtute tan chuan an tisa mamawh chu pek mai piahlamah a belhchhah dawn tih min tiam a nih kha (Matt. 6:33). Sorkar hna kher ni lo, ni tin kan eizawnna dang dangah pawh min ruaitute mit tlung khawpa hna thawh hi kan bat a ni a, chutiang ti duh lote chu a ruaituin min bân emaw min chhawr zui duh lo emaw thin a nih hi. Tlêmte chunga rinawm hmasa apiangte hi tam tak chungah pawh rinawm tura thlan an ni thin a nih kha (Matt. 25:21).
- Pathian tihna tak tak neih
Mi zawng zawngin kan mamawh leh kan nun tidanglam thei tu lian ber chu Pathian tihna tak tak kan neih atangin a ni ang. Mi tupawhin Pathian a tih tak tak chuan a hnaah a rinawm ang a, a hun takah dik takin thil a ti chat chat bawk ang. Nulat tlangvalna kawngah pawh rinawm taka awm tur chuan Pathian tihna tel lo chuan a theih loh. Dan leh Hrai kan bawhchhiat leh kan zawm loh tam tak te hi Pathian tihna nen chuan zawm theih vek a ni bawk. Dân hi awm miah lo pawh nise Pathian tih tak tak tu chuan a theih chen chenah a zawm famkim zawk thin. Sorkar, Kohhran, NGO, Mi mal/ Private leh Company hrang hrangte hian dân tha tak tak kan nei a, kan zawma kan hman tur a ni. Kan bawhchhiat fo chhan hi Pathian kan tih loh vang chauh a ni.
Pathian tih tlattu Joseph-a khan Pharao-a emaw Potiphara emaw Aigupta Sipai chak tak takte emaw a hlauh avanga sual leh dan bawhchhe ngam lo a ni lo a. Pathian a tihna avang chauhin uirena sual, Pathian huat zawng tak kha a ti hlawhtling ngam lo a. Chumi rah chhuah chu Aigupta ram pumpuia roreltu pawimawh ber, sum leh pai tam tak chet velna pawh khawiha enkawl thei khawpin a awmta a nih kha. Kan ram, kan kohhran, kan chhungkua leh mi mal nun hmasawnna tur chu Pathian tihna kan neih tak taka a tak ngeia kan nunpuia kan hmanchhuah ngam hunah zel a ni ang.
Chuvangin kum thar atang hian a tha zawngin mi mal tinte hi danglam ngam ila, Pathian tihna tak tak nen kan eizawnna te hi kalpui ila. Pathian tihna tak tak nen Kohhrana kan rawngbawlna te hi kalpui zel ila. Kan thusawi leh kan thuhril chu amahin a nung nghal bawk ang. Sorkar Sikula zirtirtu te zawng zawng hian Pathian tihna nen kan sikul enkawl ila, Private Sikulin naupang an ngah zawk te tih te hi amahin a bo vek ang. Party Worker te leh kan MLA zawng zawngte hian Pathian tihna tak tak nei vek ila, eirukna leh therhlo beiseina chu amahin a bo bawk ang.
Chutianga Pathian tihna tak tak nena a tha zawnga danglam ngam turin mi zawng zawng kan insawm a ni e.