- Reuben Lalnunthara Hnamte
Damtakin Pathian hruaina a zarah kumthar 2026 chu kan lo chuangkai leh ta reng mai. Kan fel vang leh theihna vang ni lovin Pathian venhimna a zar liau liau a ni a. Kumthar hian engtinnge kan hma hunah min hruai dawn kan hre hauh lo va. Khawvel hian eng thil nge a hmachhawn dawn tih lah kan sawilawk thei na hek lo. Kan hmalam pen khat pawh hi kan hre lawk thei bawk silova, nun uluk leh fimkhur taka kan kal erawh a ngai a ni. Kumhluiah khan engangin nge kan hunk an hman a, han thlir leta inchhir vawng vawngna tur kan nei em tih te hi in enlet a tul khawp mai. Tihiani lo thlir ho dawn ila
Hun hman that a tul: Kan damchhung hun hi a rei lo khawp mai. Mitkhap kar lekah hian thil hi a thleng zung zung mai a ni. Kan chhungkaw tana hun a tam thei ang ber kan pek te hi a pawimawh hle a; kan fate tan te hun kan pek tam hi a pawimawh. Pa pakhat pawhin a thih dawn ah” Ka damchhung hunah khan hnathawh nan ringawt hun ka hmang tam a, chhungkaw tan leh ka fate tan hun ka hmang tam tawk lo kha ka inchhir a ni” a ti. Naupangte tan hian chhungkua, nu leh pa hmangaihna leh thununna tluka enkawlna tha hi khawvelah a awm lo.
Naupangte tan chhungkua hi khawvela an lo awm tan tirh a an inzirna hmasaber leh an damchhung nun hriltu tur a ni si a. Thufing pakhat chuan “: Thingzara sava pahnih fu aiin I kuta sava pakhat a hlu zawk “ tiin alo sawi a. Kan hun hman tawh te kan ko let thei lo va, kan hmalam hun penkhat pawh kan hre hek lo. Nimahse, kan tun hun hi chu kan kuta awm a ni a; tun hun hian khawvel kan hmangral dawn a ni. Kan tun hun zel hi thil tha tih nan kan hman tam hi a pawimawh khawp mai. Tun hun chauh hi kan kuta awm, kan duhthlannaa kan kal theihna hun a ni si a. Kan damchhung hun tawite I tun hunin kan hmangral dawn a, uluk leh fimkhur taka kan kuta awm tun hi kan hman a pawimawh hle a ni.
Midangte tan hun hmang tam rawh : Mahni tan chauha nunga midangte ngaihsak lo; mahni hmasial taka mahni lawmna tur leh nawmsakna tur chauh ngaihtuah kan pung tual tual a. Kan insakte a inhnaih tual tuala, mahse, kan thinlung erawh a inhlat tual tual si. Tumah hi midangte tellova awmthei kan ni lova, in mamawh hun hi kan nei theuh mai. Midangte ngaihtuah lova mahni hmasial, mahni lawmna chauh zawngtute hi mi hlim tak leh mi awhawm an ni ngai miah lo nia; an duh ang ang nei thei mahse an hlim chuang miah lo.
Mi dangte nena khawsaho thiam lo, midangte tana hnawksak, midangte thawhpuia khawsakpui thiam lo te hi mi awhawm an ni ngai lo. Tunlaiah pawh thalai mahni hmasial, mahni lawmna chauh zawng an pung tual tuala, rilru buai, rilru hah an punga, mahni intihlum pawh an pung zel a nih hi. Mother Teresa khan Kokata khaw daifema fahrah enkawlna a din khan cheng nga chauh a nei a, kut te dawhin a kalkual thin. Mahse, a inpekna leh a rawngbawlna khawvel ramdang a thlen meuh chuan a rawngbawlna leh amah hriatrengna tur Missionary of charity dinin khawvel chaimawina sang ber pawh pek a ni ta hial a ni.
Midangte tan kan inhmangin kan luangchhuak emaw kan tih hi keimahni tan pawh hian malsawmna kawng hrang hrang hian a lo luanglut tlat mai a ni. Midangte tana nung leh inhmang thin te hi malsawmna tam takin a vur leh mi awhawm an ni zawk tlat thin. Mahni hmasial rana midangte tana inhmang lo te hian an tana malsawmna lo luanglut tur hi an dang chat a ni ber zawk.
Pathian tan hun pe tam rawh : Hun min petu leh neitu chu Pathian a ni a, a duh chuan min laksak daih thei. Ama bula kan awm tam a kan hnaih hi a duh a, a chhan chu kan tana thatna tur leh malsawmna kan dawnna tur a nih tlat vang a ni. Pa fa inhmangaih deuh hi an awm a; nitin an pafa chuan huanah te leng dunin an hlim em em thin. A fanu chu a lo thanglian a, tleirawl a lo nih chhoh chuan apa bula awm reng chu a peih ta lova, apa chu a kalbosan ta daih mai a. Apa chu a khua a har thin hle a; Nikhat chu apa tana thil hlu tak hi a rawn pe a. Apa chuan “ Bawihte I thil min pek avang hian ka lawm takzet a, nimahse, ka duh ber chu ka bula i awm a, kan pahniha hlimtaka inkawm tluka duh ka nei lo a” a ti a ni.
Pathian tan hian hun hi kan inpe tam lo lutuk a, harsatnate, buainate kan han tawk a, a tawpah chuan amah lo chu belh tur kan hre leh si lo. Sir,thomas scott chuan: “He dinhmuna ka awm chiah hian, Pathian leh hremhmun a awm tih ka hre ta, mahse, hun ka nei tawh si lo…” Khawvel I ropuite ngei pawh hian an thih dawn meuh chuan Pathian tana hun an pe lo, an ring duh lo kha an inchhir hle mai. Hun min petu chu Pathian a nih avangin chu hun chu a tam thei ang ber a tana kan pek ve hi Pathianin a phut tlat a ni. Engkimah, kan thiltihna kawng tinrengah hian kan mamawh ber chu amah hnaiha, amah tih hi a ni.
Pathian tiha, hnaih tlat tu an che chhe ngai lo; chhungkuaa Pathian hnaih tlat tu an chhungkua a chhe ngai lo; hnathawna engkima Pathian hnaih tlat tu an hmuingil zel thin. Politics a ni emaw, sorkar hna, company leh mimal hna pawh nise, Pathian tiha hnaih tlattu kan nih chuan malsawmna kan dawng zel ang. He kumthar kan lo chuan chhuah hian chhungkaw tan, midangte tan, Pathian tan kan hun te I pe tam ila; chhungkua, ram leh mial nunah te hmasawnna leh malsawmna tam zawk kan hmuh ngei I beisei ang u.