Australia chhimchhak lama ram kang nasa takah mi pakhat a thi a, mi hmunhma 300 vel a kang chhe bawk.
Kangmei hi ni eng emaw zat chhung hmun tam takah a chhuak a, a tam ber hi Victoria state-ah niin New South Wales-ah pawh a kang a, Greater London let hnih dawna zau a kang.
Victoria-ah hian emergency puan niin kang thelhtu sang telin thlawhna 70 chuang nen an thelh a. Khaw tam taka chengte chu insaseng turin an ti.
Thuneitute chuan khaw lum, ro leh thli thaw reng chuan avang kangmei chhuak hian rei tak a awh an hlau hle.
Victoria Premier Jacinta Allan chuan an state-a hmun 30-ah a la kang a, an zinga 10 chu ngaihven ngai a ni tih a sawi.
An state-ah hian Pathianni zing dar 08:00 (India-a zing dar 04:30) thleng khan hectare 3,50,000-a zau a kang tawh tih a sawi.
“Hmun tam takah a la kang zel dawn a, a khirh lai ber kan la paltlang lo a ni,” tiin Australian chanchinbu mite hnenah a sawi a. “A la kang mekte hi in leh hmunhma tam tak tana hlauhawm a la ni,” a ti.
State khawpui, Melbourne hmar lam km 110 vela hla, Longwood bula Gobur khuaah ruang pakhat chhar a ni tih police-in an sawi a, tu nge a nih an la hre lo.
Ram kang hian Victoria pumah, an khawpui Melbourne thlengin boruak a tibawlhhlawh nasa hle.
Thuneitute chuan tun tuma kangmei chhuak hi 2019-20-a Australia chhimchhaka Turkey ram tiat zet, mi 33 thihna thleng dawta a nasa ber niin an sawi.