Aizawl: ZPM party-in nimina an party office-ah kum 2026-a chhung inkhawm hmasa ber an hmannaah Chief Minister Lalduhoma chuan sorkarna an chan atanga ni sarih atangin an over draft tawh lo niin a sawi.
Chief minister chuan, “Kan hriat angin 2023 kum tawpah ni sarih chhungin theihtawpin tan kan la nghal a, chuta tang chuan vawiin thlengin kan over draft leh tawh lo a ni,” a ti.
Committed liability an tih, leibat hlui, kum hnih chhunga an tihfel chu Rs. nuai 6,311 a ni a. La rulh hmabak Rs. nuai 7,646 an nei niin a sawi a, “Kan tih ni miah lo min hnutchhiah ang hi keini chuan neih ve kan tum lo,” a ti.
Health care system an kalpui mek chu India-a a tha ber pawl a nih thu sawiin, “Hmanni deuhva Punjab-in an rawn duan thar bak kha chu India ramah a tha ber kan ni,” a ti.
“Kan sorkar atanga ni 20 lekah CBI-ah general consent kan pe nghal bawk a, buhfai buk a dik nghal em em ringnawt pawh hi a thlarau lam thil a ni a, retailer-in sem bang an hralh thin kan titawp a, retailer lawmmante pawh kan tipung bawk,” a ti.
Chief minister hian sorkar department hrang hrang hmalaknate sawiin kawng siamna khawl pawimawh kawng siamna sawisak an tuar a, kawng tha neih duh lo leh ZPM sorkar hmingthatna daltute hi manchhuakin na takin an hrem zel dawn tih a sawi.
An tum ber ram rorelnaah ‘Pathian ram thlentir’ a ni a, an sorkar hnu hian chutiang ang thlenna tur chu Pathianin a pe a, USA atangin ‘Go Harvest’ thalai rualte an kal a, an vei ber ram rorelna siam that, Pathian ram thlentir kha an thupui ber a, chutiangin Youth Festival, a sing tela Pathian faka Lammualah an inkokhawm thei kha chu lawmawm a tih thu a sawi bawk.