Aizawl: Excise & Narcotics Department chuan Thawhtanni zan khan Khatla, Tennis Court bulah methamphetamine kg 11 & gram 118 (tablet 1,20,000) leh a neitu nia puh mi pahnih an man.
An mi mante hi Yahya Hussain (23), Jagannathpur, Karimganj district, P.S Ratabari, Assam leh Lalchhuanliana, Ruantlang, M-Section, Champhai, tuna Durtlang Leitan-a khawsa mek nia inchhalte an ni.
Methamphetamine phurh kualna atana an hman, Mahindra Thar Roxx (Regn. No. MZ01 AE-4632) bakah Mobile phone pahnih hrensak an ni bawk.
Heng methamphetamine mansak te hi Assam lama ken tum mek lai an ni.
Methamphetamine vanga mante hi The Narcotic Drugs & Psychotropic Substances Act, 1985 (NDPS Act) tlawhchhanin thubuai siamsak an ni a, Thawhlehni khan Special Court (NDPS Act), Aizawl District-ah hruai nghal an ni.