Aizawl: Upgradation of Sports Infrastructure of Ngopa Playground hawnna leh Pathian hnena hlanna hun chu nimin khan hman a ni a, PWD Minister Vanlalhlana chu khuallian niin Minister F Rodingliana, bialtu MLA chu khualzahawm a ni.
Vanlalhlana chuan, “He hna hi tha taka zawh a ni thei hi lawmawm ka ti hle mai a, thla 18 chhunga zawh tura ruahman niin thla kaw chhunga zawh a ni hi ka lawm leh zual a. Kalphung thar hnuaiah chuan hna a tha tur a ni a, a hun taka zawh a ni tur a ni tiin kan sawi thin a, helaiah a taka hmuh tur a awm hi lawmawm ka ti em em bawk a ni,” a ti a.
“Kan tih thin pangngai kan ram tana tha lote kan tih loh hi kalphung tharin a ken tel a ni a, kan fel famkim kan ti lo va, eiru lo turin kan intiam a, tunah hian Mizoram chu India rama eiruk tlemna state-ah pahnihna kan ni mek a, uchuak taka MLA lirthei leina pawh nasa takin kan tihniam a ni,” a ti bawk.
“Hna reng reng tha taka thawh a nih theih nan a vilveng turin project monitoring committee kan din a, hnathawh a that leh that loh an endik a, an result pawh kum hnih chhung hian kan hmu,” a ti a. “Kan ram hi a tha zawngin a kal zel niin ka hria a, kum rei lote chhung hian hmasawnna hmel thahnem tak kan hmu zel a, sawiselna karah pawh Mizoram leh mipuite tan hma kan la zel dawn,” a ti.
F Rodingliana pawhin, “Helai hmun a hlawhtlin theihna atan hian KTP General Conference a sawi lan loh theih loh a, mi thahnemgngai leh khawtlang hruaituten theihtawp an chhuahna zara hlawhtling thei a ni. Ngopa field hi tlang chhipa awm niin a enkawl a awlsam a, a enkawl kawngah pawh khawtlang kan pawimawh dawn a, dim leh duat taka kan enkawl a ngai,” a ti a. “Ngopa tlangdung hi a leilung a tha a, kan thlai leh theite hi a hriselin a tui bik a. Hengte hi eizawnna tlaka chhawr tur leh Mizoram bakah ram pawna thawn chhuah tham thar turin kan thawhrim ka duh,” a ti.
Upgradation of Sports Infrastructure of Ngopa Playground hi NEC funding niin Rs. 3,74,43,801.00 senga sak a ni a. March 15, 2025-ah thawh tan niin September 30, 2025-ah thawh zawh a ni a, a hna hi Project Division III PWD Mizoram enkawl niin F Lalmalsawma, Tuikual South-in a thawk a ni.