Kumthar kan chuangkai hlim hlawt a, kumthar lawmna ruai har khu pawh a la reh hma hauhin zirlaiten shcool an lut leh nghal a, an tan phei chuan lehkhazir mood a awm har viauin a rinawm.
Exam hmachhawn nghal mai tur an ni hlawm lehnghal a, a pawl sang atanga a hniam lam ber thlengin zirlaite an khawngaihthlakin, hahdam leh thinthi diai a hunpui hman a har viauin a rinawm.
Sorkar hian kan school kal dan hi ennawn hret hret se la, vawilehkhatah an thlak nghal thei lo a nih pawhin ruahmanna siam kauh kauh chungin, tun hmaa kan kal thin dan calendar year (Jan – Dec) ang khan kalpui leh thei se a va duhawm em.
Kan tu leh fate state hrana lehkha zirtir kan awm ve ta nual a, kan thenawm state thenkhatte pawh hian calendar year hi an lo hmangin, zirna in tha an ni zawk fo lehnghal. Chuvang chuan kan zirna kalphung hi chu siamthat a, siamrem a hun viauin a lang.
Zirlaite pawhin kumtawp exam, an pawl sawn theihna ni nghal bawkah tang takin lehkha an zir thei ang a, hunpuiah duhthusama thlamuang leh thinthi diaiin hun an hmang thei bawk ngei ang.
Kumina school luh tan hun angte hi a fuh lutuk viau lo. Kan zirna calendar hi chu enfiah that deuh a, siamrem a va tha em.