2026 World Cup chu kumin June 11 atangin an khel tan dawn a, khawvela football hmanga inelna ropui berah hian FIFA chuan video lampang theh darhtu atan social media hriat hlawh leh lar tak, TikTok an thlang.
Kumina World Cup khelh tur hi ram pathumin an inthlen tawm dawn a, United States, Canada leh Mexico te chu a thlengtu tur an ni a. United States-ah hian khawpui 11-ah an thleng ang a, Mexico-a khawpui pathum leh Canada-a khawpahnihah an thleng dawn bawk a, a vaiin khawpui 16-in inkhel hi an thleng dawn a ni.
FIFA chuan kumin World Cup-ah hian inkhel 104 zet a awm dawn tih sawiin broadcast rights neite chuan livestream an tichhuak thei dawn tih an sawi a. Hetianga inkhel lai video tichhuak thei tur hian FIFA chuan TikTok app an thlang ber a, anni hian US ringawtah pawh an app hmangtu maktaduai 170 zet an nei a, hei hi FIFA chuan hriain a darh zau ber dawn niin an ngai a ni.
TikTok nen hian engzatin nge an inrem siam tih erawh FIFA hian an puangzar lem lo a, an inrem dan pawh kimchangin an sawi lang hran lo bawk.
YouTube chu 2022 Qatar World Cup-ah khan an lo inrempui tawh a, khatah khan pawisa an inpe tam em em lo niin an sawi.
Ram 48 zet mai chu kumin World Cup ah an tel thei dawn a, hetiang zat tel theiha an buatsaih hmasak ber a ni dawn a. FIFA-in an kawppui hma pawh hian TikTok chu Major League Soccer (MLS) lamah leh Apple TV lamah pawh an lo inhnamhnawih tawh a. Inter Miami tana Lionel Messi inkhel lai an lo buaipui ve fe tawh a ni.
Inremna an siam hnuah FIFA chuan TikTok kal tlangin tun hmaa an la tawn ngai loh thil an tawng thei dawn tih an sawi a ni.
Secretary General Mattias Grafstrom chuan stadium piah lam thil te pawh an tarlang thin dawn tih sawiin, inkhel entute pawhin a hma zawng aia hnaiah inkhel lai pawh an hmuh theih tur thu a sawi tel bawk.
Tun dinhmunah TikTok chu khawvela phone app download nasat ber a ni mek a. Hetiang a nih lai hian an ram chhung himna thilah United States chuan he app hi tihtawpah an vau mek thung a ni.