Aizawl: MNF party chuan Aizawl Municipal Corporation (AMC) inthlan lo awm turah hnehna sang tak chan an inring.
Ningania Mizo Hnam Run-a an party office bearers chu an president, Zoramthanga kaihhruaia thukhawmin inthlan lo awm turah hnehna chan an inbeisei thu hi an tar lang.
“AMC inthlan lo awm turah MNF chuan candidate tha tak tak kan nei dawn a, a lawmawm kan tiin Aizawl khawpui hmasawnna leh than zelna turin inthlan lo awm turah hian hnehna sang tak kan chan ngei kan ring tlat a ni,” tiin resolution an siam a ni.
Ram rorelnaah eptu ni chungin MNF chuan hniam lam aiin san lam panin nasa takin hma an sawn zel niin an insawi a, “Sinlung Hills Council Election leh Dampa bial by election-ah ruling party hnehin chakna kan chang a, LADC Election neih zawh takah MNF MDC an tling tam ber a, village council by election hmun hran hranah hnehna kan chang deuh vek a, he kan chakna hi Pathian leh Mipuite tanpuina leh duhsakna vang a ni tih kan hre reng a. AMC inthlan lo awm tur leh election dang awm zel turah pawh hnehna chan zel kan inringin kan beisei tlat a ni,” an ti.
Thutkhawmah hian party thil pawimawh tak tak sawihova an pawm a. Resolution an pawm zingah an party president, Zoramthanga kaihhruainaan ringtawk a, inpumkhatna leh thawhhona tha tak nen ke pen zel an tum a, Mizoram sorkar tha tak siam leh turin theihtawp an chhuah zel dawn tih a tel.
Kum thar tluang taka an chuangkai thei chu lawmawm tiin Pathian hnenah lawmthu an sawi a, ‘Pathian leh kan ram tan’ tiin theihtawp chhuahin hma an la zel dawn a, Zoram mipui zawng zawngte kum thar chibai an buk rualin ram leh hnam tana theihtawp chhuaha thawhhopui atan an sawm bawk.