ZONET TV Pvt Ltd chuan Mizoram Journalists’ Association thawhpuiin Miss Mizoram 2026 a thlang leh dawn a, an inbuatsaih mek.

Miss Mizoram 2026-a tel duh tan January 26, 2026 atangin application form lak chhuah theih a ni dawn a, application form hi ZONET Office-ah lak chhuah theih a ni. Online kaltlangin application form lak theih a ni dawn bawk a, online-a lak theihna tur chu la tihchian leh tur a ni thung.
Application form thehluh theih hun tawp pawh la tihchian leh tur a ni bawk.

ELIGIBILITY CRITERIA

Mizoram mi leh sa (Resident of Mizoram)

Kum 18 – 30 inkar

San zawng – 5’5″ chin chung lam

Nula hnahkhat (single/unmarried/not engaged)

District tinah District Miss thlan leh tum a ni a, District Miss te chu Miss Mizoram final contest-ah an tling nghal dawn. Aizawl district-a mite tan March 4, 2026-ah Open Audition neih tum a ni a, Open Audition-ah hian Aizawl District mite chauh ni loin, district danga mite tan pawh tel theih a ni.

Aizawl khawpui chhunga college hrang hrangin college miss atana an thlante chu Miss Mizoramah hian an tel duh a nih chuan direct entry pek an ni dawn a; Audition-ah inlan a ngai dawn lo a, eligibility criteria an tlin ve erawh a ngai thung.

Miss Mizoram 2026 Grand Finale neihna hmun tur chu R. Dengthuama Hall a ni dawn a, a hun atan April thla tawp lam tinzawn a ni.