Aizawl: Champhai Joint NGO Committee-in Champhaia Mizoram State University Eastern Campus dah tura sorkar an ngenna chu a hlawhtlin theih nan Champhai MLA-ten ban huama hma an lak ve ngam an phut tih an sawi.
Champhai Joint NGO Committee hian Inrinni khan Champhai Press Club-ah thuthar thehdarhtute kawmin, Champhai-a Mizoram State University Eastern Campus dah tura Mizoram sorkar an ngenna leh an hmalak dan tlangpui an hrilh fiah a. Lungleia Mizoram State University din a nih theih nan Lunglei MLA ten ban hial huama an tang ngam angin, Champhai-a Mizoram State University Eastern Campus dah tura sorkar an ngennaah Champhai MLA te pawh an tan nat ngam ve an beisei thu leh an phut thu an sawi.
Tun dinhmunah Champhaia Mizoram State University Eastern Campus dah tura an ngenna chu a rem rih lo a nih pawhin Govt. Champhal College-a Stream li – Arts, Commerce, BCA leh Science zirna a awm mekah, Post Graduate zirna tal Mizoram sorkar an ngen a. An thil beisei leh duhna hi a hlawhtlin theih nan tul ang zelin an nawr dawn tih sawiin, Champhaia zirna in sak zawk a awm theihna tura an hmalaknaah mipuite chu theihtawpa tawiawm turin an sawm nghal a ni.