Aizawl khawpui chhung kawngpui thawm that hna thawh mek chu April 15, 2026-ah zawh fel tum a ni a, kum thum tal laih chhiat loh nise tih a ni.
Inrinni zan khan ZPM Vice Pesident C. Lalnunnema leh ZPM General Headquarters hruaitu thenkhatten Aizawl khawpui chhung kawngpui thawm that hna thawh mek, Bungkawn leh Nursery inkara hna thawh an tlawh a, Aizawl Road North leh Road South PWD hna vilnaa a khaikhawmtu ber Er. Lalrinngheta, SE, Central Circle chuan Aizawl khawpui chhung kawngpui thawm that hna thawh mek chu April ni 15 hian zawh fel an tum tih thu a sawi.
Er Lalrinngheta chuan tuna hna an thawh mek hi Aizawl khawpui kawngpui resurfacing project awm tawha la lian ber a ni tih sawiin, he hna hi kum 2024-2025 hmalakna niin nikum April atang khan contractor-in a thawk tan a, km 83 thawm that a ni dawn tih a sawi a. Kum 2025-26 hmalaknain km 20-30 hna a awm leh mek tih a sawi a. He hna hi EPC mode a nih thu leh programme duan sa a ni a, mipuite pawh tikhawtlai lo turin a chah.
Er Lalrinngheta chuan kumin April 15 chuan thawh zawh an tum tih sawiin, resurfacing satliah a ni lo a, a tha leh to ber chi Bituminous Concrete (BC) hnaa thawh a ni a. A chhah zawk hi 30 mm tur niin, water proof a nih sa avangin seal coat a ngai lo tih sawiin, “Laih chhiat leh mai mai kan remti lo a, kan ui hle a ni. Kum thum tal laih chhiat loh ni se kan ti a, contractor hian maintenance kum thum mawh a phur tel bawk,” tiin ZPM hruaitute a hrilh.
Bungkawn atanga Nursery thawh zawh a nih hunah Maubawk thleng meter 600 hna thawh chhunzawm a ni dawn a, hnathawktu hi NIDIH, Silchar an ni a. Anni hian Aizawl kawngpui thawm that hna package hniha then chu hmun hrang hrangah an thawk mek a ni.