Hollywood film director lar James Cameron chu kar liamta khan podcast pakhatah inlanin, a film siam tawh hrang hrang zawhna zawh a ni a, mipui beng verh tak tak a sawi nual.
Titanic film chungchang sawina kal zelah Cameron chuan a film tawp dawna Jack-a vur tui vawta a pil bo ta riai riai chungchang chu a zawhna tawn ber leh a nin ber a nih thu sawiin, damchhuahtir tura betu leh hrihtu an tam hle niin a sawi a, mipuite chu engmah zawhna zawt tawh lo tur a ngen hial.
Kum 71 mi director chuan, Jack chungchang kha chu min zawt tawh lo hram rawh u, a dam chhuah theih leh theih loh kha chu ka hre bik lo, engmah chhanna ka pe thei bik lo che u a ni, tiin an kawmna kaltlangin a sawi.
History behchhan neia film siam a nih miau avangin kum 1912 a Titanic lawng pilah khan Jack-a chu mak takin a lo damchhuak mai thei a, mak takin khawiah emaw a lo awm khiah a ni thei. Engmah ka hre bik lo, film-ah kha chuan a damchhuak lo a ni mai a, engmah chhanna ka pe zui thei bik lo che u a ni, a ti.
Cameron hi director zingah dollar billion 4 chuang senga film siam thei hmasa ber leh awmchhun a ni mek a, a film siamte hi an hit in, sum pawh billion chuang fe an lalut hlawm bawk a ni.