Spain chhim lama rel insuah mi 21 vel an thi a, mi dang tam takin hliam an tuar bawk a. Thuneitute chuan an rama kum 10 chuang hnua rel chetsualna lian ber tlingah hian thi hi an pun a rinawm hle tih an sawi.
Madrid pan relin a kawng zawh sualin anmahni tawk zawnga tlan rel chu Córdoba khawpui bul, Adamuz-ah a su a ni.
Rel pahnihah hian passenger leh thawktu 400 chuang an chuang niin rail networks chuan a sawi a. Naupang pali telin mi 24 vel hliam na tak an awm tih Andalusia-a emergency services chuan an sawi.
Spanish Transport Minister Óscar Puente-a chuan he chhiatna thleng hi ‘thil mak tak’ a nih thu sawiin chhui zuina tur thupek a chhuah nghal a. Rel thila mi thiamte rawn an ni vek dawn tih Madrid-a thuthar lakhawmtute hnanah a sawi.
Rail network operator Adif chuan relin Madrid pan relin Málaga a chhuahsan atanga minute 10, Pathianni tlai dar 06:40 (India-a zan dar 11:10)-ah tawhsual hi a thleng tih a sawi.
Rel pakhatin a sutna avangin pakhat zawk hi a sir kawrah a tla niin Puente-a chuan a sawi a. Thi leh hliam zinga a tam ber hi rel pahnihna zawka chuang an ni a, Madrid atanga Huelva pan an ni tih a sawi.
Rel insu hi darkar khata km 400-a chaka tlan thei, Freccia 1000 niin Italian rail company Ferrovie dello Stato thupuangtu chuan Reuters news agency a hrilh.
Rescue team-te chuan rel pindan lette kaih thawh tumin an bei a, a chhunga tangte lak chhuah pawh a harsa hle tih an sawi.
Video darh thenkhatah chuan rel pindan hi a letin a awm a, chhanchhuah hna thawktute lawnin a tukverh atangin a chhunga mite lak chhuah tumin an bei tih a lang.
Madrid leh Andalusia inkara rel tlan tur zawng zawng chu Thawhtanni atan bik tihtawp vek a ni.
Málaga atanga chhuak rel enkawltu, mi mal rail company chuan a kawng zawh sual zawk relah hian mi 300 vel an chuang a, sorkar firm Renfe enkawl, a sut zawkah hian mi 100 vel an chuang thung.
Chetsualna thlen chhan hi hriat a la ni lo va, chhui zui tur niin thla khat vel hun a duh dawn tih transport minister-in a sawi.
Kum 2013 khan Spain-ah hian hmarthlang lama Galicia-ah rel chak chiin a kawng zawh suala chesualin mi 80 thiin 140-in hliam an tuar a, hei hi an rama rel chetsualna rapthlak ber a tling.
Spain-a rel chak chi inthlunzawm hi China dawta khawvela lian ber a ni a, khawpui 50 chuang a tlawhpawh a. Adif chuan km 4,000 chuanga thui niin a chhinchhiah.