Aizawl: Mizoram Youth Commission (MYC) kaltlanga India ram pum Lehkhabu Chhiar inelna (Reading Decathlon)-a Mizoram atanga tel school pahnih – Mt Carmel, Chaltlang leh La Montessori, Mission Veng chu pahnihna leh pathumna an ni.
He inelna hi Food4Thought Organisation leh Monocept te tangkawpin an buatsaih a ni a, inelna hi quiz round hrang hranga neih a ni. Inelna hi level thum – State level, Regional level leh National level a kalpui a ni. National level-ah hian school 10 an tling a, January 17, 2026-ah Hyderabad-ah neih a ni.
National level hi Mizoram aiawh te hian flight cancel vangin a hmunah an tel theilo a, inelna buatsaih tute’n online a tel an phalsak a, MYC office atangin national level competition-ah hian an tel a. Zing dar 8 atanga neih tan niin, tlai 5:30-ah zawh fel a ni.
He inelnaah hian a vaiin lehkhabu 100 chuang hret hmanga inel a ni a, Mizoram aiawh school, Mt Carmel atanga tel pahnih – Krista Roluahpuia Khiangte leh Rebek Malsawmzuali ten pahnihna dinhmun an hauh a; La Montessori atanga tel pahnih – Malsawmhlui Pachuau leh Joshua Lalawmpuia te chuan pathumna dinhmun an hauh bawk.