Aizawl khawpui kawngpui siam mek a ni a, khawpui chhung tlan pawh a nuam tan tawh hle. Rorellai party tan pawh insawitheihna tham a ni chho mek.
Hetih lai hian kan kawngpuite hi laihchhiat ni tawh lo hram se, chu chu a hmangtu mipuite duh dan pawh a ni vek awm e.
Engemaw harsatna a awmin department thenkhatin an laichhe leh mai thin hi a pawi a, siamthat zui a ni tawh ngai bawk si lo. Rual rem lo deuha hnawh a ni a, fur khua a paltlangin a chhiat a zual a, kawngpui chhiatin a zui ta thin.
Tuna kawngpui siam leh mek pawh hi a tha in, tlan pawh a nuam leh hle tawh a, ni rei lote a liam ang a tutemawin an laichhe leh mai ang tih a hlauhawm hle. Chutiang a thlen loh nan chuan vil zui ni thei se la, loh theih loh avanga laihchhiat a lo ngai a nih pawhin thu delhkilh awm ngeiin siamtha lehnghal tura tih ni thei zel se a va duhawm em.
Kan kawngpuite hian duat an phu a, lirthei neitute hian kawngpui thaa tlan hi kan phu bawk. Chuvang chuan tuna kawngpui siam pawh hi tha takin enkawl leh vilven zui ni thei se la, sorkar pawhin tichhe theitute chungah dan khauh tak siam mawlh teh se.
Kawngpui thaa kan awm reng theih nan duat ila, tuna kawngpui siam pawh hi hun rei zawk daih turin i vil zui hlawm bawk teh ang u.