India-a rorel lai, BJP chuan an hruaitu hlun, Nitin Nabin-a chu an party national president atana thlangin Thawhlehni atang khan a nihna thar a chelh ta a, Jagat Prakash Nadda a thlak.
Kum 45 mi chauh, Nabin-a hi BJP-in national president a neih tawha naupang ber niin inawpna tihchak leh chhuan hlui atanga chhuan thar kuta hruaitu chanvo hlan an kalpuia bul tantu a ni dawn a. A kaihhruaina hnuaiah hian West Bengal, Tamil Nadu, Assam leh Uttar Pradesh inthlan hmachhawnin kum 2029-ah ram pum huap inthlanpui a awm bawk ang.
BJP-in president atana Nabin-a an ruat lai hian an elpui ber, Congress chu kum 84 mi, Mallikarjun Kharge-a kaihhruaiin an la kal dawn a ni.
BJP hruaitu thar hi tun hmaa a lo thawhpui tawhte chuan thawkrim, party dah hmasa ber thin rilru pu a ni tih an sawi a. A hniam bera mite tan pawha biakpawh awlsam leh mi dang rawn kawnga taima niin an sawi.
Hindu sakhuaa hnam tha, Kayastha mi niin anni hi politic-a tan lam nei ngai lo an ni a, pawl dang nen pawha intihbuaina nei ngai lo leh an bula mite tha tih ang zawm mai harsat lo nia sawi an ni.
Prime Minister Narendra Modi leh Union Home Minister Amit Shah-a te pawhin an hruaitu atana an duhthlan a ni a. A kum la tam lo mah se Nabin-a hi pawl hruainaah kum 20 dawn inhmang tawh niin Bihar-ah an party thalai a hruai a, Chhattisgarh-ah Congress paih thlaknaa tangkai tak niin BJP sorkartir lehtu langsar a ni.
MLA pawh vawi nga ni tawh a ni a, Bihar-a Patna West bial (tunah chuan a awm tawh lo)-ah kum 2006 khan thlan tlin niin a hnuah Bankipur bialah vawi li thlan tlin a ni zui a. Bihar-ah hian law, roadways leh urban development department-te changin minister a lo ni tawh bawk.
Ram pum huapah BJP thalai pawl, Bharatiya Janata Yuva Morcha national general secretary a ni zui a, Bihar BJP president a ni tawh bawk.
Kum 2023 khan Nabin-a hi Chhattisgarh assembly inthlan dawnah BJP chuan state incharge-ah an dah a. Hemi tum hian Bhupesh Baghel-a kaihhruai Congress chu chak leh ngei tura rinkai vek ni mah se BJP hi hnehna a chanpui.
Politic thlir mite chuan a hniam ber atanga a thawhna, an pawl inkhaidiat a siksawi leh mi tin banphaka a awmna chu hemi tum pawh hian an chakpui niin an sawi.
Bihar-ah an party a tihchak piah lama Chhattisgarh-ah tha taka a campaign hi national president ni tura Nabin-a bawrh chhuaktu nia ngaih a ni a. Hna hautak leh khirh tak pawh tha taka hlen chhuak thei a nihna hi hruaitu hlun zawkten an duh chhan nia ngaih a ni.
Nabin-a hi Thawhlehni chawhma khan Delhi-a an party hmunpuiah president hna a tan a, a lawm luhnaah hian Prime Minister Modi-a pawh a tel a ni.