Aizawl: Tourism Minister Lalnghinglova Hmar hovin Tourism Department hotute leh Council of Churches in Mizoram (CCM) aiawhte chuan tun hnai Mizoram tourism chungchang thlir hovin, Thawhlehni khan MINECO-a SAD Conference Hall II-ah an thukhawm.
Tourist te chu Mizo nunphung leh khawsak dan hre sa bik lova lo lut an ni tih sawiin Lalnghinglova Hmar chuan, tourism chuan mi zawng zawng a nghawng avangin kohhran leh khawtlang hruaitu te, tlawmngai pawl te nen thawhhona tha tak nei a lo dawnsawn a ngai tih a sawi a. “December thla chhungin district pathum belh tel lovin khualzin mi nuai 1.1 chuang kan nei a, kan ramah hunpui kan hmanlaia lo kal chak te an ni a, nakin zelah pawh hetih hunlai hi khualzin tam hunlai tur a ni. Hei vang hian mipui lamah sensitisation leh awareness uar zawka kalpui zel kan tum. Kan lo dawnsawn dan tur mipuiten kan lo hriatthiam bakah eng chinah nge tihte pawh kan hriat a pawimawh,” a ti.
Lalnghinglova Hmar chuan Biak In chu khualzinte tlawh chak zingah a tel a, Biak In chhunga awmdan tur leh inthuam dan tur thlenga mikhual lamin an hriat theihna tura hmalak dan leh, eng chinah nge an lo tel ang tihte sawiho a pawimawh hle a ni tiin, CCM nena hmalakho dan turte ngaihtuah a tul thu a sawi.
CCM lam pawhin Mizoram a khualzin pung chu lawmawm an tih thu leh Mizoram tlawhtu an pung chuan Kohhran pawh a nghawng tel thu an sawi a. Chuvangin, Kohhran anga ngaihtuahna sen a, hma lak tul an tih thu an sawi.
Thutkhawmah hian hun remchang hmasaah ngun zawka thawhho dan tur ngaihtuah leh hmalakna awm thei tur hrang hrangte thlirhova thutkhawm leh an rel a. CCM lam pawhin hma lak an duhdan te ngaihtuahin lo thukhawm ve se tiin an rel bawk.
Thutkhawmahah hian CCM atangin President Rev. Dr. R. Lalbiakliana hovin an tel a. Tourism Department atangin Lalsangpuii Hmar, Joint Secretary; R. Lalrodingi, Director leh official dangte an tel bawk.