Aizawl: Transport Minister Vanlalhlana chuan lirthei chungchanga dan an neih that laiin road safety lama tan lak a ngaih thu a sawi.
Thawhlehnia MINECO-a Mizoram State Road Safety Council chu thukhawmin, Road Safety Month hman dan tur an rel a. He hunah thu sawiin transport minister chuan India chu USA dawtah khawvela road network nei tha ber a ni a, Mizoram kawngpui pawhin hma a sawn zel a, India rama road accident a pung chho zel leh hemi avanga thi leh hliam pawh an tam chhoh zel thu sawiin, heng accident zinga zaa 70-te chu lirthei khalh chak vang a nih thu a sawi.
Minister chuan kum 2024 khan accident tum 4,87,705 a thleng a, mi 1,77,177 an thi a, mi 4,71,455-in hliam an tuar a. Mizoramah nikum khan accident tum 73 a thleng a, mi 56 an thi a, mi 45-in hliam an tuar a. Accident chuan mi tam tak nunna a lak mai piah lamah India ram hausakna pawh a nghawng a. Kum tinin India GDP 2.5% atanga 3% thleng chu accident thlen avanga sensoah a hlohtir ziah thu a sawi bawk.
Sorkar laipuiin ‘road safety’ a ngaih pawimawh thu leh khauh taka dan kenkawh a nih theih nan leh mipuite tana a awlsam zawk nan khawl thiamna hmanga kalpui a tum chhoh zel thu sawiin transport minister chuan, lirthei fitness endik te, license exam, lirthei register, insurance leh thil dangah a duh khauh tial tial bakah e-enforcement hawi zawngin hma lam an pan zel tih a sawi.
Thutkhawmah hian Road Safety Month chu February, 2026-a hman tura rel a ni a. Thupui thlan sa, ‘Sadak Suraksha Jeevan Raksha (Road Safety Life Safety)’ tih chu hman tur niin, February 2, 2026-ah a hawnna hun hman tura rel a ni a. District tinah police department-te nena tanghovin MV Act mila Special Enforcement Drive neih tur a ni a. Zirna in leh sorkar pisa hrang hrangah road safety thutiam chham tura rel a nih bakah, police leh transport department-a thawktuten kawngpui hmangtute, sikul naupangte leh lirthei khalhtute tan traffic dan chungchangah te, lirthei chetsualnaa inbawihsawm dan tur te leh bawihsawmtute thubuai laka an himna tur dan chungchang te hrilhhriatna hun hmanpui tura rel a ni.
Thutkhawmah hian C. Lalruaia, Secretary, Transport Department bakah Transport Department official-te leh PWD, H&FW, Planning, UD&PA, Finance, H&TE, School Education, ICT Department leh AMC aiawhte an tel.