Aizawl: Kumin Chapchar Kût lawmna tur duan fel niin, chawlhkar khat chhung lawm tura ruahman a ni.
Chief Minister Lalduhoma kaihhruaiin Thawhlehni khan Chapchar Kût 2026 Organising Committee te chu CM Conference Hall-ah an thukhawm a. Kumin Chapchar Kût programme kimchang an duang fel a. Chawlhkar khat chhung lawm turin an ruahman.
March 9, 2026-ah Chapchar Kût puala tlan neia kut lawmna bul tan tur a ni a. He tlan pual hian kum dang ang bawkin Central YMA-in anmahni sensovin T-shirt buaipui tura ruahman a ni a. March 10-ah Handloom, Textile & Handicraft, Food Processing & Food Court hawn a ni ang a, a hmun tur erawh la ruahman fel a ni lo va. He mi ni vek hian Aijal Club Lawn-ah flower show hawn tan a ni ang.
March 11-ah painting, photo exhibition leh Chapchar Kût film show Vanapa Hall leh Lianchhiari Rûnah hawn a ni ang a. March 11 leh 12-ah Art & Culture department buatsaihin Falkawn Zokhuaah Living Museum neih a ni ang.
A lawmna pui ber hi March 13-ah Lammualah zing dar 10:30 atanga neih tur a ni a, darkar ruk chhung a awh ang a. Chief Minister Lalduhoma chu Kût Pa a ni ang a, Art & Culture Minister C. Lalsawivunga chu kût thlengtu a ni ang.
Kumin Chapchar Kût-ah hian bawlhhlawh hnutchhiah lo kût kalpui tum a ni a. Kût thupui atan hian ‘Zo nun ze mawi – Inremna’ tih a ni ang.
Kumin atang hian chief minister chawimawina Nopui sem a ni tawh dawn a. Nopui dawng tlaka ngaih rawtna hrang hrang lut zing atangin a tum khatnaa dawngtu turte chu thlan fel a ni a. Chief Minister Nopui hian pawisa fai Rs. nuai 1, citation leh memento te a keng ang.