Assam Congress Chief Gaurav Gogoi-a chuan an state assembly inthlan lo awm turah All India United Democratic Front (AIUDF) leh an thawkdun dawn lo tih sawiin titi awm reng chu a titawp.
Guwahati-a thuthar lakhawmtute a kawmnaah Gogoi-a hian Congress chuan inthlan chu anmahnia chuhin a hniam ber atanga intichak tura beih chu an thupui a ni tih a sawi a. AIUDF nen chuan inhriat thiam tawnna emaw, inkungkaihna emaw tunah leh nakinah pawh an nei lo tih a sawi.
Assam Chief Minister Himanta Biswa Sarma chu ei ru leh hmasawnna ruhrel chi hrang hrang, kawng chhawng siam leh thil dangah chief minister hian ‘pocket money’ a dawng ve thin niin a puh.
Gogoi-a chuan hna lian tak tak thawh chu hmasawnna lantirna a nih rualin a tihhlawhtlinna kalkawngah ei rukna a inphum niin a sawi a. Congress chuan Assam-a BJP kaihhruai sorkarin an ei rukna leh sorkar an kaihhruai dan dik lo tak chu an puang zel dawn tih a sawi.
Congress MP hian heng thil hi Assam mipuiin an ngaihven telh telh a, langtlang, rintlak leh vantlangin a tak tak an tangkaipui tur hmasawnna an duh niin a sawi.
Chhattisgarh chief minister hlui, Congress hruaitu hlun, Bhupesh Baghel-a pawhin Assam Chief Minister Sarma chu liantham taka ei ru leh a thuneihna hmang dik lovah a puh.
Manabendra Sharma Complex, Dispur-a thuthar lakhawmtute an kawmnaah Baghel-a hian Assam chu tuna sorkar mekin ei rukna nasa taka an hruai avangin ‘chhiatnaah’ an luhpui niin a sawi.
‘A vanduaithlak tak zet a. Assam hi tihchhiat a ni a, kan zavaiin kan na a ni,” a ti.
Kum 2021-a assembly inthlan sawi kaiin Baghel-a hian kha inthlanah khan amah leh Congress hruaitu, Mukul Wasnik-a chu observer an ni a. Assam politic-ah khatih lai khan mi sual inphiar zawmna lian tak a awm tih sawiin, “Langsar takin sawi rik a ni a. Tunah hian ei rukna nasa tak awmin a hmaa khatiang ai pawh khan a lian daih zawk a ni,” a ti.
Baghel-a hian tun hmaa inhnialna lo awm tawhte pawh sawiin Louis Berger case pawh a sawi chhuak a. Sarma chu amah an puh leh inhnamhnawihna thilah BJP a zawm hnuah sawi rik a ni ta ngai lo nia sawiin ‘Chief minister hian a hmaa ei rua puhna awm zawng zawng a tichhe vek’ niin a sawi.
Baghel-a hian Sarma-a hausakna leh thil neihte chu rei lo te chhungin a pung nasa hle niin a sawi a. Kum 2006 khan Rs vaibelchhe 1 a neih a, kum 2011-ah kha chuan Rs vaibelchhe 3, 2016-ah Rs vaibelchhe 6 leh 2021-ah chuan Rs vaibelchhe 17 a kai tawh tih a sawi.
“Hetiang taka hausakna pung chak hi chu ngaihven ngai tak thil a ni,” a ti a. Chief minister leh a chhungte thil neih leh hmunhma chu Assam-a district hrang hrangah hmuh tur a awm niin a sawi.
Sorkarin mi ram a laksak, subsidy kalpui leh thil kalpui dan awm sa thlak zawng zawng chu mi mal tute emaw, minister leh an chhung leh khatte leh an sumdawnna hlawkpuina tur thil vek zela tih a ni tih Baghel-a chuan a sawi a. Thingpui huan ram buai leh saite kalna tur kawng siamsak zawng zawng pawh mi mal tute emaw hlawkpui theih tur zela tih a ni thin niin a sawi.
Baghel-a hian kum nga liam ta chhungin Majuli, Kamrup, Guwahati, Nagaon, Golaghat leh Karbi Anglong-ah mi ram laksak a tam em em nia sawiin a hlut zawng phei chu chhut chhuah theih rual loh a nih thu a sawi.