Congress party chuan election kalpui theih loh khawpa harsatna lian tham awm si lo va, ZPM sorkar chu Dampa bial by-election-a an chak loh vang leh LADC inthlana pathumna an nih avangin a hun taka Aizawl Municipal Corporation (AMC) inthlan buatsaih ngam lohah an puh.
MPCC Spokesperson Dr. Lallianchhunga chuan January 16-a Mizoram State Election Commissioner-in thu thar thehdarhtute a kawm tuma AMC term ral hmaa AMC inthlan buatsaih a nih loh tur thu leh kumin April emaw, May emaw-ah inthlanna neih a nih tur thu a puang chu ZPM kaihhruai sorkarin a hun taka AMC inthlan buatsaih tumna an neih loh sa vang hrim hrimah an ngaih thu, Nilainia Aizawl Press Club-a thu thar thehdarhtute an kawmnaah a sawi.
AMC term dinglai thiat (dissolve)-a AMC enkawltu tur, administrator ruat ngai hiala inthlanna a tikhawtlai hi democracy kalphung palzutnaah an ngai tih sawiin Dr Lallianchhunga chuan, “Dampa bial by-election a an chak loh avang leh LADC inthlana pathumna an nih avangin ZPM sorkar hnuaiah AMC inthlan a buatsaih thei lo va, hreh tak tein a hreh niah kan ngai,” a ti.
Dr Lallianchhunga chuan AMC inthlan buatsaihna tur leh AMC sorkar thar din a nih theihna atana tih tur tul ang ang chu State Election Commission (SEC) hian a peih vek tawh tih sawiin, “AMC term kal mek chu kumin March 1-ah a tawp dawn avangin SEC chuan hmeichhe ward tur chu nikum May 30-ah a tifel tawh a. AMC Final Electoral Roll pawh January 7 khan tar chhuah a ni tawh,” tiin, inthlan kalpui theih loh khawpa harsatna lian tham awma an ngaih loh thu a sawi.
AMC inthlan buatsaih theihna chhana SEC-in chhuanlam a siam zingah sorkar hnathawkten budget leh financial year closing an buaipui a ngaih avanga election duty tur indaih loh chungchang chu mi thiam leh thil hre zawkte sawi danin, tun ang hunah chuan department-te budget proposal chu finance department-ah a lut kim tawh thin a. Budget hi staff zawng zawngin an buaipui loh bakah a buaipui tur bik department staff an awm zel avangin harsatna a awm lo va; HSLC leh HSSLC Board Exam chhuanlam pawh board exam buaipuitu tur zirtirtu hman tur an tam tawk tih a sawi a. Board exam laia huau huau mipui punkhawmna tur Chapchar Kût pawh chawlhkar khat hman tura a buatsaih hreh loh dan atang hian AMC inthlan tihkhawtlai chhana board exam an puh daih hi a inhmeh lo hle tih a sawi.
LADC inthlan zawh hlim a nih avanga EVM indaih lohna chhuanlam pawh Mizoram state pum pui MLA bial 40 daih EVM a neih laia LADC huam chhung bial 25-a hman loh tam tak awm tura ngaih a nih thu a sawi a. Budget session hun pawh AMC election nena insu buai lo tura ruahman theih a nih thu a sawi bawk.
‘AMC election chungchangah state sorkar a inrawlh lo’ nia sawi chungchangah pawh state sorkar rawn lovin eng election mah a buatsaih thei lo zawk tih sawiin Dr Lallianchhunga chuan, “Dan leh thupek kenkawh dan tur chungchangah te, election senso chungchangah te leh election duty tur atana state sorkar hnathawk ruat chungchang thlengin state sorkar rawn ngei ngei a ngai a. Election Commission of India ber pawhin state assembly election chungchangah state sorkar a rawn thin zawk a ni,” a ti.
MPCC spokesperson chuan ZPM sorkar chu tun hnaia tual chhung inthlanna a che chhe hle a, hetiang hi a thleng leh thei tih hriain chhuanlam a dap a. AMC inthlan a tihkhawtlaitir hi mipui din dan a ni a, chhuanlam an tar lante hi state sorkar chin fel theih vek a ni tih a sawi a. AMC inthlan a hun taka an buatsaih duh lo chu mipui zah lohna a ni tih sawiin, an chhuanlam hrang hrang chhuanlam tlinga an ngaih loh avangin a rang lama AMC inthlan buatsaih vat sorkar phut tih a sawi.