Thawhlehni, January ni 20 khan a music documentary film thar ‘Infinite Icon: A Visual Memoir’ Paris Hilton chuan tichhuakin, hetah hian a fate pahnih a hruai tel ve a, thlir an hlawh hle.
Kum 44 mi Hilton chuan a fate Phoenix Barron,3 leh London Marilyn,2 te chu duat taka kaia, pawm dunin, a tan chuan a khawvelte an nih tak thu amah kawmtute hmaah a sawi.
A fate chungchang an zawhna pawh hlim taka chhangin, a fate chuan music an tuipui thu leh a thiltihna kawng engkimah an tawiawm that thin thu a sawi a, khawvel khawi hmunah pawh min tawiawmin, ka hruai thei zel a, ka fate tana nu tha ber nih zel pawh hi ka tum a ni, a ti.
A music documentary film thar hi Hilton-i naupan lai atanga a hun hman chhoh dan hrang hrang awmna niin, a album hmasa ber atanga music khawvela a nun a thlak kual dan hrang hrang a awm bawk. Tin, a tleirawl chhoh leh kum 2000 chho vela tihduhdahna leh media lama hun harsa a tawh lai thlengin a awm.
Hilton chuan, ka nun ka han chhui let a, ka paltlang tawh harsatna hrang hrang a lo tam hle. Ka suangtuah thin anga stage-a ka concert ve ta mai te, home video a lo darh ta hluai thlengte khan mak tih leh tah hun ka ngah fo thin, a ti a.
Tunah erawh ka fate hi ka khawvel an ni tawh a, ka pasal Carter Reum nena chhungkaw tha tak din a, hun nuam leh tha tak hmang chunga khawvel hmachhawn hi ka duhthusam a ni chho ta, a ti zui bawk.
‘Infinite Icon: A Visual Memoir’ hi January ni 30 atanga theatre-a chhuah tan tura ruahman a ni.