Tottenham Hotspur chuan Thawhlehni zan khan Champions League-ah Borussia Dortmund chu 2-0 in an hneh a, an chak avangin manager Thomas Frank-a dinhmun a ziaawm hret a; mahse, bân theih dinhmunah a la ding reng.
Khawthlang chanchinbu thenkhatin Frank hi tun kar chhungin Spurs-in an bân dawn niin an la ziak hial tho a ni.
Premier League-ah Frank-a hoin Spurs-in beisei an pha lo a, 14-na niin point 10 chiahin tla thei dinhmuna atanga himin an khelh hnuhnung pangaah vawi khat chiah an chak.
Inrinni zan khan tla thei dinhmuna awm mek, West Ham United chu 2-1-in an hneh lo a, inkhelh bânah mipuiin an ‘boo’ bakah ‘Naktukah an bân dawn che’ tiin Frank an au el hial a, an manager lakah an lungawi tawh lo.
Danish coach hoin Premier League-ah beisei pha lo mah se Champions League-ah erawh an khel tha a, palinaah awmin knockout stage an lut tawhah a ngaih theih.
Dortmund laka an chaknaah hian Spurs tan Cristian Romero leh Dominic Solanke ten goal an khung a. An inkhelh zawhah pawh fan thenkhatin Frank hi chhuak tura an duh thu an au chhuahpui tho.
Hetiang karah hian Frank chuan, “Hnehna kan chan hian chhan hrang hrang vangin min tilawm a. Kan khelh that avangin ka lawm a. Goal hnih kan khung a, goal kan chhuah lo bawk a. Point thum hmuh hi a hlu a, a sang pariat zinga awm ngei kan tum a. Burnley-ah kan insawrbing leh ang a, chumi zawhah Frankfurt kan thlir ang. Fan-te pawhin club tana theihtawp an chhuah avangin ka lawm,” tiin a sawi a, bân mai tumna la nei loin hmathlir thui tak a la nei a ni.