Aizawl: Ranglong mipuite kût ropui ber, ni thum awh (20-22 January), ‘Ranglong Khohui’ Panisagar, Tripura-a neih chu Adviser to CM (Political) Lalmuanpuia Punte, MLA leh Adviser to CM (Health) Dr. Lorrain Lalpekhlua Chinzah, MLA ten an hmanpui.
Khuallian Lalmuanpuia Punte, MLA chuan ZPM sorkarin Zohnahthlak inpumkhatna leh inunauna a ngaipawimawh tih sawiin, “Ranglong emaw, Zohnahthlak dang tute pawh nise Mizo vek kan ni a, kan tawng hmante pawh Mizo tawng vek a ni. Duhlian tawng kan hman loh avangin Mizo ta lo bik riau a inngaihna hi a dik lo va, Mizoten kan tawng hman tlanglawn ber Duhlian/Lusei tawng hmang ve lo hi Mizo lo deuha kan ngai thinte hi a dik lo va, kan zavaiin unau vek, Mizo vek kan ni a, Zohnahthlak tawng hrang hrang kan hmang mai zawk a ni,” a ti.
Thusawitu dang, Dr. Lorrain Lalpekhlua Chinzah, MLA pawhin tun hma lam chuan hnam hrang hrangte indoa inrun thin an ni a. Chung hunlai ngaituah chuan tun huna Zohnahthlak an lengho dial dial thei chu lawmawm a tih thu a sawi a. Ranglong unaute hian an hnam nun leh tradition vawng nung zel turin a chah a, mahni hnam hriatna leh vawn nun zel nachang hriat chu thil pawimawh tak a nih thu a sawi.
Ranglong Khohui hi nizan khan a tiak a. He hun hmanpuiin MZP General Hqrs. Vice President Sanghmingthanga hovin MZP hruaitute an tel a. Zo Reunification Organisation (ZORO) General Headquarters Thalai General Secretary Chinkhanmanga Thomte hovin ZORO Thalai hruaituten an hmanpui bawk.