Aizawl: Kum 2024-2025 chhungin hmarchhakah Mizoramin ni tin bawnghnute a thar chhuak tlem ber.
Bureau of Animal Husbandry & Statistics 2024-25 tar lan danin, kum 2024-25 chhungin Mizoramin bawnghnute 64.4 Thousands KG per Day (TKgPD) a thar chhuak a, hmarchhakah ni tin bawnghnute a tharchhuak tlem ber a ni.
Mizoram Milk Producers Cooperation Union Limited (MULCO) leh National Dairy Development Board (NDDB) te’n Ningani khan Mizorama bawnghnute tharchhuah leh sawngbawlna lam tihhmasawnna tur thawhhona thuthlung (Memorandum of Understanding) an ziak a. Chief Minister Conference Hall-ah Chief Minister Lalduhoma leh Cooperation Minister PC Vanlalruata te hmaah an ziak a ni.
Thawhhona tura inremna hi Mizoram sorkar aiawhin Udit Rai Prakash in a ziak a, National Dairy Development Board aiawhin S. Rajeev, Executive Director, NDDB in a ziak a, Mizoram Milk Producers Cooperation Union Limited (MULCO) aiawhin Lalhmunliani, Managing Director chuan a ziak.
Thawhhona an ziahah hian National Dairy Development Board hian Ministry of Cooperation Flagship Scheme White Revolution 2.0 dung zuiin Mizoram tan Comprehensive Dairy Development Plan a siam ang a, chumi ti hlawhtling tura Mizoram Milk Producers Cooperation Union Ltd te hmalakna tur a duang ang a, technical lam leh thil tul tinrengah NDDB hian a thawhpui dawn a ni.
Hmarchhaka Mizoramin ni tin bawnghnute a thar chhuah tlem ber thu hi sorkar thuchhuah chuan a tar lang a ni.