February 2, 2026 atangin kuthnathawktute thlai thar chi lite Mizoram sorkarin lei leh hralh a kalpui tan dawn a. Mizoram pawna chin sawhthing hralh tum lo turin mipui a ngen.
Mizoram Agriculture Marketing Board (MAMB) chuan Ningani khan Aizawl Press Club-ah thu thar thehdarhtute an kawm a, thla thar atanga thlai thar chi nga lei leh hralh tur an sawi fiah a. MAMB Co-Chairman Dr KC Lalmalsawmzauva, Adviser to Chief Minister (Handholding) chuan sorkarin thlai thar lei leh hralh a kalpui turah thlai chi nga a awm tih sawiin, heng zinga chi li – sawhthing, aieng hring, hmarchate ro leh hmunphiah ro te chu February 2 atangin lei a ni dawn tih a sawi.
Dr KC Lalmalsawmzuava chuan sawhthing chu May 30 thleng, kg 1-ah Rs 50 zelin; aieng hring chu April thla thleng kg-ah Rs. 20, hmarchate ro pawh April thla thleng, kg-ah Rs 350 leh hmunphiah ro chu March thla thleng, kg-ah Rs 80-in lei a ni dawn tih a sawi a. Hei bakah Mizo buhhum chu nikum November atangin tun thla chhung kg-ah Rs 30-in lei mek zel a ni tih a sawi a. Heng thlaite hi rate aia sanga lei duh an awmin leitir theih vek a ni tih a sawi.
“Buffer stock kan siam dawn tawh lo a. Mizoram puma Secondary Collection Centre (SCC) 64 kan neih atangin a chingtuten an hralh tawh ang. A hralhtute hi society member an ni tur a ni a, mi mal tin bank account-a support price hi a luh dawn avangin bank account nei vek turin SCC tinte hriattir an ni,” Dr. KC Lalmalsawmzauva’n a ti.
MAMB co-chairman chuan SCC tinte chuan an huam chin chauh a mi sawhthing an hralh tur a ni tih a sawi a. “Sawhthing chu society member ta chauh, Mizoram chhunga thar chiah lak tur a ni a. Kum liam taah Mizorama thar ni lo la luta hralh an awm avangin vawiin thlengin a man la dawng mumal lo pawl an awm,” tiin, tun tumah hian thleng nawn tawh lo se an duh tih a sawi a, chutiang an awm a nih chuan a tul dan angin an chungah action lak a ni dawn tih a sawi.
“A hralhtute sawhthing bag bikah ‘tag’ dah a ni ang a, ration card number, hming, khua leh phone number dah a ni ang a. Sawhthing man tlawm leikhawma ‘support price’ beisei an awm a, heng mite thil tih hi kan pawm dawn lova khaw tin fimkhur turin kan chah a ni,” Dr. KC Lalmalsawmzauva chuan a ti.
Zawhna chhangin Dr. KC Lalmalsawmzauva chuan nikum khan khaw hrang hranga sawhthing thar zat tura rin an chhut chhuak sa vek tih sawiin direct benefit transfer hmanga a man an pek dawnah an thar zat tur aia tam hralh anga ziak lut an awm avangin Mizoram pawna sawhthing lak luh chu rinhlelhna awm tan a, an enchian hnuah an man chhuak a, pawisa an pek hmain an ching fel hman tih a sawi a. Kuminah chuan SCC tinah mawhphurtu atan sorkar hnathawkte an dah tawh dawn a, chumite chuan an bial chhunga sawhthing an lakkhawmte chu Mizoram chhunga mi ngei a ni tih fiahnan certificate an siam a ngai dawn tih a sawi.