Inrinni zan khan German Bundesliga khelh chhunzawm a ni a, season kal mekah tlawm nei lova kal tluang mek Bayern Munich chuan an mikhual FC Augsburg an hneh lova, a vawi khat nan an tlawm. Bayern an tlawm lai hian Borussia Dortmund in hnehna an chang ve thung a, an inkar a zim phah hret.
Bundesliga a champion lai leh champion nawn leh thei tura hmahruai mektu Bayern Munich hian Allianz Arena-ah table hnuai lama awm FC Augsburg an mikhual. An mualah bul tan thain, goal thun hmasa zawk ni bawk mah se chawlhlawk hnu lamah goal hnih an chhuah a, an mualah mak tak maiin an tlawm teh tlat.
Bayern Munich tan hian Hiroki Ito chuan minute 23-naah Michael Olise siamsak atangin hmahruaina goal a thun. An mualah goal thun hmasa zawk an nih vangin Bayern hi awlsam taka chak leh tura ngaih an ni a. Ito goal thun hmang hian hun rei tak chhung hma an hruai nghe nghe.
Team lian leh chak thei tak Bayern Munich laka an si phurh sut thei lawk lo mah se Augsburg an buai mai lova, mikhual an nihna mualah huaisen takin an inlan. Beisei phak baka khel tha Augsburg tan hian Arthur Chaves chuan minute 75-naah goal thunin an si phurh a sut. An si phurh an sut vangin an phur tak zet a, chak tum ngam khawpin huaisenna thar an nei. An si phurh an sut atanga minute ruk hnu lekah Han-Noah Massengo chuan hma an hruai letna goal a thun zui ta hial nghe nghe a ni.
An mualah ngei hnufual an nih hnuin Bayern in an si phurh sut ngei tumin tan an khawh zui nasa viau a, hlauhawm siam bawk mah se hun tawp thlengin an si phurh an sut thei tawh lo va, Bundesliga season kal mekah a vawi khat nan an tlawm zui ta a ni.
FC Augsburg hneh lova Bayern Munich an tlawm laiin pahnihnaa awm mek Borussia Dortmund chuan Emre Can, Nico Schlotterbeck leh Maximilian Beier te goal thun hmangin 1. FC Union Berlin an hneh a, awlsam takin point thum an hmu. Awlsam taka chak Dortmund hian an chunga awm Bayern Munich nen point thumin an inkar an tizim a, an inkarah point 8 a la tla zep mek a ni.