Aizawl: Aizawl bawrhsap Er. Lalhriatpuia, IAS chuan Ui khuahkhirh chungchangah thuchhuah siamin, ui khuahkhirh loha thlah zalen lutuk hi mi pawi sawina a ni thei a. Khawlaiah kan vah tir mai mai chuan mihring tan a hlauhawm bakah khaw chhung a ti tawp thin. Tin, ui a hri danna pek loh in mi a seh phei chuan ui neitu hremna a nep lo hle, a ti.
Hetiang hi a nih avangin Aizawl DC chuan Section 163 of BNSS, 2023 tlawhchhanin, kan ui vulhte khuahkhirh a, ui a hri laka Aizawl district mipuite him theih nan a hnuaia mi ang hian thupek a chhuah chhunzawm bawk.
Ui vulhtuten ui a hri danna (Rabies vaccine) an ui vulhte an pe vek tur a ni.
Khawlaiah zalen takin an ui an chhuah tir mai mai tur a ni lo.
An chhuahpui dawn a nih pawn hrui (leash) rinawm takin an kai ngei tur a ni.
An zun leh ek khawlaiah an hnutchhiah tur a ni lo.
Midang tana harsatna siam thei zawngin ui an vulh tur a ni lo.
Ui khuahkhirh lovin mihring a seh chuan Section 291 BNS, 2023 hmangin thla ruk (6) chhung lungin tan emaw Rs. 5000 thleng chawi theih a ni.
He thupek hi thla hnih chhung atan a ni a, thupek zawm lote chu Section 223 of BNS 2023 hmanga hrem theih an nih tur thu a sawi.