Aizawl: Mizoram Larsap chuan Pathianni khan Lai Autonomous District Council (LADC) Chief Executive Member (CEM) atan C Lalsawmzuala (MNF) a ruat. Hei vang hian Central Young Lai Association (CYLA) pawhin Lawngtlai district pum huap total bandh an neih tur an thulh.
12th Lawngtlai Chandmary bial atanga MDC atana thlan tlin C. Lalsawmzuala hi United Legislature Party (ULP) Leader a ni a, ULP-ah MNF MDC 8 leh INC MDC 7 an thawkho a, MDC 15 an nei. LADC-ah hian sorkarna siam turin MDC 13 neih a ngai. Larsap chuan C Lalsawmzuala hian thlawptu a neih dan January 29, 20216-a fiah turin a ti.
Larsap chuan Protem Chairman atana C Hrangthianga a ruatna pawh Pathianni vek khan a ti chhuak. Ruahman lawk dan chuan Chairman thlanna chu January 28, 2026 khian Protem Chairman kaihhruaina hnuaiah neih a ni ang.
Hetih lai hian, CYLA chuan Lai Autonomous District Council inthlanah sorkarna siam thei an awm tawh hnuah pawh sorkar lam atanga remtihna a la awm loh avang leh an hmalaknain awmzia a neih loh avangin January ni 26, 2026-a Lawngtlai district huapin tiam chin awm lo total bandh neih an tum a, mahse sorkar atanga thu lawmawm dawngin LADC sorkar siam turin approval a chhuah tak avangin total bandh neih tur a ruahmanna siam chu thulh a ni.