India-a him dawn lo nia an inhriat avanga Bangladesh-in ICC T20 World Cup an khelh dawn loh hnua Pakistan pawhin thla thara inelna lian lo awm tur hi an khel lo mai thei bawk a, kar tharah thutlukna an puang ang.
Pakistan Cricket Board (PCB) chair Mohsin Naqvi-a chuan an prime minister, Shahbaz Sharif-a nen Bangladesh an inhnuhdawh hnuah Thawhtanni khan an tel dawn leh dawn loh hi an sawi dun tih a sawi.
International Cricket Council (ICC) chuan Bangladesh ai hi Scotland tel turin Inrinni khan thu a lo titlu tawh a. Inelna hi India leh Sri Lanka-in February 7 leh March 8 inkara an inthlen tawm tur a ni.
Naqvi-a chuan Sharif-a hnenah hian ‘ICC rilru puthmang a hrilh’ nia sawiin hlawk takin an inkawm tih X-ah a tar lang.
“Sharif-a hian ngaihtuahna hrang hrang sena sawiho a nih hnuah ching fel turin thu min rawn a ni,” a ti a. “Thutlukna hi Zirtawpniah emaw, Thawhtanniah emaw kan siam ang,” a ti.
Pakistan thuneitute hian inelna pum boycott nge India nena an inkhelh tur bik chauh tihah thutlukna an la siam thei lo nia hriat a ni.
Pakistan hian India hi T20 World Cup-ah hian February 15 hian Colombo, Sri Lanka-ah an hmachhawn dawn a. Nikum khan ram pahnih hian inremna siamin ICC thiltiha inkhelh an ngai a nih chuan mahni khelmual lo ve vea khelh ni se an ti a ni.
Politic-a innghirnghona avangin ram pahnihte hi mipa inelna bikah kum 2013 hnu lamah inelna lianah an inhmachhawn tawh ngai lo va, India phei chu kum 2008 atangin Pakistan-ah a la inkhel leh lo.
Pakistan-in hetianga thu an neih hma hian Bangladesh Cricket Board (BCB) chuan India-a inkhelh chu a him dawn lo nia ngaiin a hmun sawn turin an lo thlen tawh.
India nena an inkar chhe mek avangin Sri Lanka-a khelh an dil a; mahse, ICC chuan ‘an tan a him lo tih hriat chianna a awm lo’ tiin a hnawlsak.
Inrinnia thuchhuah an siamah ICC chuan BCB nen hian vawi tam sawihova chin fel dan an dap hnuah awmzia a awm loh avangin an aiawha khel turin Scotland an ti ta tih an puang.
Tun thla tir lam khan Board of Control for Cricket in India chuan Indian Premier League (IPL) franchise Kolkata Knight Riders hnenah Bangladesh cricketer Mustafizur Rahman chu politic thil avangin chhuahtir turin an lo ti tawh a ni.
August, 2024-a Bangladeshi mipuiten an prime minister an paih thlak tak, Sheik Hasina-i India a tlanchhiat hnu leh hawtir tura Dhaka-in a ngenna Delhi-in a chhan duh loh avangin ram pahnih inkar hi a tha lo tan a. Tun hnaiah Bangladesh-ah hian Hindu laka kutthlak sawi awm avangin India hian an himna tura hma la turin a nawr a, awmzia a awm thei lutuk lo niin a lang a. Hetiang karah hian India-a Muslim awmte pawh him lo thei niin ngaih theihin boruak a awm mek a ni.