Bangor International Airport, Maine, US atanga thlawk chhuak mi mal thlawhna chesualah a chuang mi pasarih an thi a, mi pakhatin hliam na tak a tuar bawk.
Bombardier Challenger 600 hi Pathianni zan dar 07:45 (India-a Thawhtanni zing dar 06:15) khan a tla niin Federal Aviation Administration (FAA) chuan a sawi a. Dam chhuak awm chhun hi a thawktu (flight crew) zinga mi a ni.
He chhiatna hi US ram zau tak vur tla leh vur thlipui na takin a tuam mek lai, mi eng emaw zat thia mi sang telin power an neih loh phah laia thleng a ni a. Thlawhna khalhtute hian an tlak hma hian tumhmun hnenah khua an hmuh that theih loh thu an thlen hman a ni.
Bangor hi Thawhlehni thlenga vur tlak nasatna tur hmun tia sawi lawk a ni.
Thawhtanni khan FAA chuan mi pariat phur thlawhna hi Pathianni zan thim hlimah ‘a thlawh chhuah hnu lawkah a tla’ tih an puang a. Thu an chhuahah a kang tel niin an sawi bawk.
Bangor International Airport chuan emergency crew-ten an ngaihven nghal tih an sawi a. A chhan an chhui zui a, thite nihna hi engmah an puang rih lo.
Sorkarin a chhinchhiah dan chuan thlawhna hi Houston, Texas-a law firm hminga inziak lut a ni a. Air traffic control atanga inbiakna hriatah chuan a khalhtute hian an tlak hma lawkin khua an hmuh that theih loh thu an dawng a; mahse, hei hi thlawhna tla taa mite biakna ngei a ni em tih chian a ni rih lo.
Hemi hnu lawkah hian controller chuan ‘passenger phur thawhna a let’ tih sawi hriain thlalakah tlankawnga khu leh thil kang a darh zui a ni.
US-ah hian vur tla nasa avangin thlawhna 11,000 chuang zin tur thulhtir an ni a, Pathianni bikah khan 5,500 dawn thulhtir an ni.
Philadelphia, Washington DC, Baltimore, North Carolina, New York leh New Jersey tumhmunte pawh a buai pawl an ni.
Vur hi Maine-a Bangor velah chuan inches 10-16 vel a tla tawh niin Thawhlehni tuk khan National Weather Service chuan a sawi.