Tun hnaiah kut inthlakna avangin nunna hial chan an awm leh a, hei hi a pawi hle. Nunna hi a hlu a, mihring siam theih a nih loh avangin a nghawng pawh a na hle tih hriat thar a va tul em.
Kan hnam hian kan kalphung kan thlak hret hret a, kan inchhungah khawvel ram dangte nun dan kan hmu vek thei tawh a, an khawsak dan thlengin kan hre chho ve zel bawk. A tha lai chu zawm mai tur kan nih lai hian a chhe lam thlenga kan entawn lek lek ta nia lang hi chu a veiawm thin hle.
Mizote hi aia upate zah thin hnam, zonunmawi hmanga thang that hlawh mek kan ni a, kan nih zel pawh a beiseiawm lai hian tuteemaw vanga kan hmai bal leh lek lek thin hi a pawi a, kan insiamthat a ngai hle.
Kan tlawmngai pawl lian ber YMA branch thenkhatte chuan zonunmawi inzirtirna leh thu pawimawh hrang hrang inhrilhna hunte an branch member naupang zawkte hrilhna hun an nei thin a, khawvel hmasawnna leh thang chho zelah pawh hei hi a tul viau thin reng a ni.
A huhoa huai tak, mahnia awma dawihzep em em si hi a awm theih a, heng mite hi a tlangpuiin belhchian an dawl lo hle. Tin, thin ram lutuk leh awmkhawmna apianga buaina siam zinga tel tum tlat pawl nihte hi a zahthlak a, nu leh pate pawhin kan fate kan zilh that a tul viau.
Zonunmawi nei hnam, changkanna kawng hrang hrangin min luhchhuah chung pawha chu zemawi tak lantir fo thei reng hnam kan nih hrerengin, Mizo hnamte hi i inhmangaih tawn fo thin ang u.