Aizawl : Ministry of Development of North Eastern Region (MDoNER) leh North Eastern Council (NEC) bultuma ‘Ek Bharat Shreshtha Bharat’ campaign – Ashtalakshmi Darshan Youth Exchange Programme neihah Mizoram Chief Minister hlui Zoramthanga, MNF President chu a bika sawm a nih angin Thawhlehni khan a inlan a. Ram pawn atanga zirlai mikhual lokalte hmaah thu a sawi.
Youth Exchange hmanpuitu Zoramthanga chuan, Mizoram Peace Accord hi India ram chanchina inremna thuthlung ziah tawha hlawhtling berte zinga mi, vawiin thlenga remna tlo leh tluantling bera chhal ngam, hunin a finfiah tawh, ram dangte pawhin an remna thuthlung atana an entawn a la ni reng tih a sawi.
“Remna hi a hlu a, remna kan neih atangin Mizoram pawhin hmasawnna tam tak kan hmu tawh a. Pathianin min pek remna hi thangtharte leh chhuan lo la awm zel tur te’n ram hmasawnna nasa zawk an neih zel theih nan hlut nachang hriaa remna humhalhtu kan nih a pawimawh tak zet a ni,” Zoramthanga chuan a ti a. Remna tel lova hmasawnna tluantling a hmuh theih loh angin remnain a thlen thin hmasawnna nasa zawk kan ramin a hmuh zel theih nan remna vawng nungtu ni turin zirlaite a chah bawk.
Zirlaite atanga zawhna chhangin Chief Minister hlui, MNF President Zoramthanga chuan, “Mizoram ramri dep thingtlang khuaa piang leh seilian, naupang rethei ve tak, inhlawhfa chawp chunga lehkha zir ngai, zalenna suala rammu tawh kha Mizoram Chief Minister tum thum ka nih theihna chhan hi Pathian malsawmna bakah chuan ka tumruhna a ni,” a ti a. Harsatna karah pawh tumruhna nghet tak chuan dinhmun tha zawkah min khaichhuak leh mai thin a, tumruhna chuan harsatna min paltlangtir thei thin a ni, a ti.
January 15-28, 2026 chhunga neih Ashtalakshmi Darshan Youth Exchange Programme-ah Andaman & Nicobar Islands leh Lakshadweep atangin zirlai 20 ve ve leh faculty coordinator pahnih ve ve, an vaiin mi 44 an tel a ni.