Aizawl: Jal Jeevan Mission (JJM) hnuaia thingtlang khuaa tui lakte enkawl leh ruahmanna siam dan tur chungchang sawi ho na, Delhi-a Thawhlehnia neihah PHE Minister Prof. Lalnilawma chuan thu sawiin, sorkar laipuia JJM sum tang rei lutukte pek chhuahsak thuai thin turin sorkar laipui hotute a ngen.
Union Minister of Jal Shakti C.R. Patil hona hnuaia state tina PHED leh RD/LAD Minister te nen ‘Minister-Level Policy Dialogue on Sustainable Operation & Maintenance of Rural Drinking Water Services’ neihah PHE Minister Prof Lalnilawma chuan, India ram pum huapa JJM sum, Ministry, central sorkara tang rei lutukte pawh pek chhuahsak thuai turin a ngen.
Prof Lalnilawma chuan, Mizoram chu phai lam ang a nih loh thu te, tui lakna hnarte pawh khua atanga hla tak taka awm an nih hlawm avangin, hnathawh leh enkawlzui pawh khawtlangin an enkawl tur atan chuan a hautak bik thu te sawiin, “Keini ang tlangram tan chuan chona lian tak a ni a, chutihrual chuan theihtawp kan lo chhuah ang,” a ti.
Sorkar laipui programme JJM hi kum 2019 atang khan Mizorama thingtlang khaw tinte tan, tui connection a thlawna pek a ni. Tun dinhmunah hna hi zawh thawkhat tawh a ni. Kum 2019 atanga kum 2025 chhungin Solar Pumping Scheme – 188, Gravity Scheme (khawl tel lova tui lak) – 657 leh electric pump hmanga tui pump – 7, a vaiin 852 thawh zawh tawh a ni a, Mizoram thingtlang khua zawng zawngah hmalak a ni.