Aizawl: Tlangnuam Branch YMA ten Ruihhlo Do kumpuan hawnna hun Zirtawpni zan kaltaa an buatsaih hmanpuitu Central YMA President R. Lalngheta chuan, YMA member kalkhawmte chu tih tak zeta ruihhlo do kawnga tan la thar turin a chah.
Central YMA president chuan thu sawiin, “Tunhma chuan proxyvon a hluar a, kan hruaitu hmasa ten theihtawp chhuahin an do a, hnehin a awm tawh a. Hun a lo kal zel a, No. 4 kan mi hausa faten an ching a, a lar zual leh a, tunah chuan ram pumah a lo darh ta a, nu leh pa tirumtu, he ruihhlo hian chhungkua a tichhia a, mi rethei fate thlengin kan ‘addict’ ta zel hi a rapthlak lutuk a, beng sika thapui thawha hma kan lak a tul tawh takzet a ni,” a ti.
Aizawl khawpui hi Zone 10-ah thenin ruihhlo do beihpui an thlak dawn tih sawiin R Lalngheta chuan, “Branch tina kumpuan te pawh kan do hneh ngei theih nan kan kut a fai tur a ni a, Pathian malsawm tlaka fimkhur taka thawh a tul a, kohhran tinten ruihhlo a rem theih nan bang lovin i tawngtai theuh ang u,” tiin kal khawmte a sawm.
R. Lalngheta chuan, “Kan khawtlangah ruihhlo la ti lo te hi i fuih sauh sauh ila, a ti tawhten nghei an harsatzia kan chiang a, a ti lote hi an rilru hneh turin tan kan lak a tul tak meuh meuh a ni,” tiin Kumpuan Ruihhlo Do hawnnaah a sawi.