Mizoramin autonomous body kan neih pathumte thutthleng hi a nghing nasa thei hlawm viau mai a, state sorkar inthlak apiangin an buai zui duh hlawm viau bawk.
Tun hnaiah Lai Autonomous District Council (LADC) lam an inthlang a, inthlan result puan a nih hnu, hun rei fe chhung chu sorkar siam a la ni thei chuang lo a, kohhran thleng pawhin hei hi a vei.
LADC a ni emaw, ADC dang a ni emaw chiri taka an lang leh thin hi a pawi a, tuna sorkarna siam mektute hian ngelnghet takin kalpui hlawm se la, sorkar chak leh chhenfakawm din mawlh hlawm teh se.
LADC lamah pawh sorkar ngelnghet a awm ngei an beisei thu leh an duhdan pawh a nih thu Lairam Isua Krista Baptist Kohhran (LIKBK) chuan an sawi a, hetianga kohhran lam hialin awka an neih ngaia awm pawh a zahthlakna chen a awm thei awm e.
Eng party pawhin sorkarna siam se, eng party pawh lo thawk ho se, sorkar ngelnghet leh tlo, hna thawk tam thei tur leh an mi leh sate innghahna tlak ni thei turin nghet se la, chu chuan an huamchhungah theuh rahtha chhuahin, hmasawnna pawh a zuang nasa thei ngei bawk ang.