Aizawl: Aizawl Mayor Lalrinenga Sailo-in AMC inthlan neih turah MNF-in sorkarna an chan leh ngei a beiseiawm tih a sawi.
He thu hi Thawhtania MNF Hnam Run chhung inkhawmah AMC Mayor hian a sawi a. Kum khat ZPM an sorkar hnu maiah, inthlanna hrang hrangah chakna an chang zui ta meuh lo va, hengte avang hian AMC inthlan pawh hi an huphurh a, an tikhawtlai ta rih nia ngaih theih a nih thu a sawi.
Aizawl khawpui hi chak zawka hma a sawn theihna turin MNF enkawl sorkar chuan Municipal Act 2008 siamin, Aizawl khawpuiah municipal hi din a ni tih sawiin Aizawl mayor chuan, “Chuvangin, AMC chungchangah hi chuan MNF hian neitu nihna kan nei a, Aizawl khawpui hmasawnna tura hmalakna kawngah Aizawl khawpui mawina leh hmasawnna tur hi kan dah hmasa fo a ni. Finance Commission atanga sum kan dawn state sorkar atanga tihkhawtlai ni mah se, theihtawpin hmasawnna hrang hrang kan thawk,” a ti.
“India hmarchhakah municipal tha ber pawl kan ni a, MNF-in term hnih kan chelh chhungin hmasawnna tam tak kan nei a, khualzin veivakte hmuhtlak Aizawl khawpui fai siam kawngah te, Silent City ni thei tura hmalaknaah pawh hian AMC chuan Traffic Police te chu parking leh kawng thawm leh chei mawi kawngah theihtawpin kan thawhpui a ni,” tiin, MNF kaihhruai AMC hmalakna leh ruling sorkar dinhmun en hian, AMC inthlan neih turah hi chuan MNF hian sorkarna an chan leh ngei a besiseiawm tih a sawi.