Aizawl: Tun hnaia 2026 SAFF Futsal Championship khelh zawh taka silver medal latu India team-a tel, Mizo futsal player parukte chu Sports Minister Lalnghinglova Hmar-in nimin chawhnu khan MINECO-a a pisa-ah lawmpuina hun a hmanpui.
Sports Minister Lalnghinglova chuan, “India team-ah Mizo thalai paruk an tel hi a lawmawm hle a, international a nih tawh hi chuan eng thilah pawh kawng a awlsam tawh ngai lo. Mizo player hetiang zat India team-a kan tel thei leh, India team in silver medal a la thei hian Mizo zingah theihna sang a awm tih a tilang a, theihtawp kan chhuah zel a tangkai dawn a, a pawimawh,” tiin a sawi.
Lalnghinglova Hmar chuan, “MFA Futsal Committee te hmalakna leh inpekna a fakawm hle. Sorkar atangin inpuihna tam tak inpek tur a awm lo va, anni’n theihtawp chhuahin hma an la thin a ni. Tun thlengin Mizoramah futsal inelna mumal tak a awm a, kan thlen chin pawh a sang ve hret hret zel,” a ti.
Minister hian India team-a tel Mizo player-te hi Mizoram Sports Incentive Cash Award sem leh hunah an tel ve theih tur thu a sawi bawk.
South Asian Football Federation buatsaih futsal inelna hi January 14 atanga 26, 2026 chhung khan Thailand-ah neih a ni a, a vawikhatna a ni nghe nghe. India squad-ah player 14 koh niin heng zinga paruk lai chu Mizo an ni. India hian match ruk atangin vawi thum hnehna changin vawi hnih draw result an nei a, a pumpuiah pahnihna an ni.