Aizawl: Mizoram State Road Safety Council (MSRSC) buatsaih, lirthei khalh fimkhur hapta ‘Road Safety Month 2026’ chu Thawhtanni khan Transport Minister Vanlalhlana’n a hawng.
Directorate Conference Hall, Transport Department-a hawnna inkhawmah thu sawiin Vanlalhlana chuan, Road Safety Month chu mipuite himna tur ngaih pawimawhna hun a nih thu leh road safety chuan lirthei khalhtu atanga lirthei chuangte leh kawngsira kea kalte thlenga a huam thu a sawi a. Sorkar chuan infrastructure tha leh dan tharte siamin kengkawh mah se, a hlawhtlin nan mipuite thlawpna a ngai tih a sawi.
Lirthei chu mihring tan pawimawh mah se, a khalhtute fimkhur loh avangin chhungkaw tam tak a nghawng thei a, nunna channa, chhungkaw tlakranna, ramtuileilohna thlengin a thlen thei tih sawiin transport minister chuan, India ramah kum tin accident leh accident avanga thi leh hliam an pung a, a chhan bulpui ber, 70% vel chu lirthei khalh chak vang a ni a. Nikum lama Mizorama lirthei chetsualna 73 awmin, thi 56 leh inhliam 45 an awm tih a sawi.
Vanlalhlana chuan road safety chu mipuite tana a awlsam zawk nan ‘electronic’ leh ‘smart’ zawnga kal chhohpui zel an tum thu sawiin, Transport Department hnuaia service tam tak chu office-a kal kher ngai lovin mipuiin an awm hmun atangin an nei thei tawh tih a sawi a. He thla hi mi tinin dinhmun inenfiahna hun tangkai, thil thar zirna leh hriatnawnna hun, document fel lo chinfelna hun atana hmang turin a sawm.
Kumin hi Mizorama Road Safety Month hman a nih vawi 4-na a ni a. Thupui atan ‘Sadak Suraksha – Jeevan Raksha’ (Road Safety – Life Safety/Fimkhur la, i nun humhim rawh) tih hman a ni.