Aizawl: Mizoram Pradesh Congress Committee-a PAC Member ni mek, TT. Zothansanga, MLA hlui chuan Lengpui/Sihphir ram IAF hnena hralh nia sawi chungchangah thil mak a thleng tih sawiin, DC account-ah pawisa (compensation award) a luh niah chiah sorkarin CBI General Consent a hnuh kirna order a tichhuak tih a sawi.
Thawhtannia MPCC-in Congress Bhavan-a chhung inkhawm an neihah thu sawii TT Zothansanga chuan, “DC account-ah pawisa a luh ni, June 27, 2025 chiah mai khan kan sorkar chuan CBI General Consent a hnuhkirna order an tichhuak a, a hnu lawk, July 1, 2025-ah Gazzette Notification a chhuak nghal a ni. Pawisa lo thlen rualin CBI Consent a hnukkir te te a, FIR thehlut ru, chhui ru te an ti a, mipui hian kan hrethiam khawp mai,” a ti.
TT Zothansanga chuan ram inlei danah hian Preliminary Notification chhuah atanga pawisa inpek inkar hi ni 70 a ni a. May 15, 2025-ah Preliminary Notification chhuahin, DC account-ah June 27, 2025 khan pawisa lutin, July 21, 2025-ah CM-in a pawmpui a, July 22, 2025-ah Final Land Acquisition Notification chhuah a ni a, July 24, 2025-ah IAF-in sorkar pawmpuina an dil a, a tuk July 25, 2025-ah payment an ti nghal a. August 1, 2025-ah compensation award chu pawmpui a nih thu a sawi.
ZPM leh MNF-ten CBI chhui an cho a, Press Conference-ah nasa takin an inbei a, Congress-te pawh CBI chhui theih tura FIR thehlut turin an phut hle tih sawiin TT Zothansanga chuan, “Sorkar tha leh felfai an inti a, chuti anih chuan he ram inleina hi CBI anmahni ngeiin chhuitir se a inhmeh hle ang,” a ti.
“Ram hralh chungchangah hian MNF-te hmalakna leh hnuhma vek angin ZPM-ten an sawi a, fel lo leh dan bawhchhiatna, a ruka hralh tumna ang thlenga inpuhna a awm. Acre 138-a zau Rs. vbc. 248 niin, NOC pawh MNF hun laia an lo pek fel vek tawh thu tar lan a ni. ZPM te hunah hian Rs vbc 50-a tihniamin, Rs vbc. 198-ah an tla thla a, hetia an tlak thlak hian, MNF-ten rawn bei ngam lo tur anga ngaiin, a chak a chakin an kalpui ta mai em ni kan ti a ni,” a ti bawk.