Ei rukna nia sawi chhui chhuaka chanchinbua an chhuah hnuah Chinese chanchinbu mi (investigative journalist) pahnih chu Sichuan province-a sorkar hotuten an man niin mihring dikna chanvo humhalhtuten an sawi.
Liu Hu leh Wu Yingjiao te hi an thil chhui chhuah an tihchhuah hnuah Pathianni khan police-in an la niin an sawi.
He thil hian China-a chanchinbu leh a thawkte nekchepa thuneituten mi mana an hrem thin chuan sawi a hlawh thar phah hle.
Chengdu police cuan thawh tanni khan mipa pahnih, kum 50 leh 34 mi, Liu leh Wu hi ‘a dik lo puh leh dan lova sumdawnna kalpui’ chhuinaah man an ni tih an sawi a. Chinese sorkar chuan mi man leh dikna chanvo humhalhtuten an sawiselna an la chhang lo.
Liu-a hi China-a thil chhui chi chanchinbu mi hriat hlawh tak niin kum 2013 pawh khan eirukna a chhuinaah thuneitu sang tak a puh hmingchhiaa puhin man a lo ni tawh.
Kum 2014-a chhuah a nih hnuah a hna ngai thawk chhunzawmin a thil hmuhte chu social media-ah a tar lang thin a ni.
Wu-a hi Liu-a’n WeChat account a siama a thawhpui niin chanchinbu mi dangte nen thu thar an tar lang thin.
Chinese leh ram danga mihring dikna chanvo humhalhtu pawl telhna, Chinese Human Rights Defenders chuan Liu-a hi rela an khua, Chongqing atanga Beijing khawpui a pan laiin a chin hriat zui a ni lo tih an sawi.
Wu-a hi police-in Hebei province-ah hemi ni vek hian an la bawk tih an sawi.
An pahnih hian tun hnaiah an province-a ei rukna nia sawi an chhui chu an tichhuak tih an sawi a. An thu ziah hi WeChat-ah chuan hmuh tur a awm tawh lo va, thuneitu pakhat chetna avanga sumdawnna tlakchhiat phah ta chungchang a ni.
Liu-a hi man a nih hma khan WeChat-ah Chengdu disciplinary inspection thuneitu hnen atanga message a dawn eng emaw zat tar langin an thil chhui chhuah chu puangzar lova thuneitute hrilh zawk tura tihna a nih thu Reporters Without Borders (RSF) chuan a sawi.
“He thil hian China hi a hrana thil chhuia ziaktute an khuahkhirhzia a tilang hle a ni,” tiin RSF advocacy manager Aleksandra Bielakowska-a chuan a sawi.
RSF-in an sawi dan chuan China-ah hian chanchinbu mi 120 chuang man awmin ‘khawvela chanchinbu mite lung in lian ber’ tiin an sawi a ni.