Barcelona forward Raphinha chuan season a hman that viau laia 2025 Ballon d’Or a dawng lo kha hrilhhaithlak a tih thu sawiin, Ousmane Dembele aiin chawimawina dawn kha a phu zawk niin a insawi.
Paris Saint-Germain striker Dembele hian Raphinha khelhpui, Lamine Yamal khumin September, 2025 khan footballer mi mal chawimawina ngaihhlut ber, Ballon d’Or a dawng a. Raphnihna chu pangana a ni phak ve chauh a, hei hi mak a ti tawp thei lo.
Raphinha chuan, “A lo berah Top 3-ah kha chuan ka lan ka ring a nia, pangana ka ni pha chauh tih ka hriat khan ka lawm lo tak zet a ni,” a ti a ni.
“Ballon d’Or dawn hi a harsa hle tih ka hria a, dawng thei tur chuan Champions League a pawimawh em em bawk tih ka hria a. Thil awm dan ka thlirin min dahnaah khan lung a awi thei ngang lo a, kha chawimawina dawng tur khan ka indah nghet tlat a ni,” a ti bawk.
A sawi zelnaah, “Ka ngaihdanah chuan mi mal chawimawina dawng tur thlan dawn chuan inelna pakhat chauh tehfunga hman chi niin ka ngai lo a. Season ka hman that dan te, nomawi ka lak te, khelmuala ka chet dan te leh ka thil hlen chhuah atang te kha chuan Ballon d’Or dawng ngei ngei tur ka ni,” a ti.
“Season ka hmang tha bawk a, ka lawm a, ka lung a awi em em a. Season liam taa ka thil tih kha mi mal chawimawina dawn loh vang khan dah hniam chi a ni lo,” tiin Raphinha chuan a sawi.
Season liam taah khan Raphinha hi Barcelona tan inelna hrang hrangah vawi 56 a inlan a, hengah hian goal 34 a thun bakah mi goal thun tur vawi 25 a siamsak bawk.
Barca chu LaLiga nomawi bakah Copa del Rey leh Spanish Supercopa te a lakpui.
Champions League bikah pawh Raphinha hian vawi 14 a khelhah goal 13 a thun a, a thiante goal thun tur vawi kua ngawt a siamsak bawk a, Barcelona chu semi final a thlenpui bawk.
Dembele chuan Paris Saint-Germain tana vawi 53 a khelhah goal 35 a thun a, nomawi pathum a hlawh chhuahpui a. Ligue 1, Coupe de France leh Champions League nomawi te a lakpui a ni.
Kum 29 mi Brazilian forward Raphinha hi Ballon d’Or an sem tirh atanga a lungawi lohna kha tun thlengin a la reh thei tak tak lo a, a sawi chhuak reng mai a. Chawimawina dawng tur puan a nih hma khan mi tam tak chuan dawn a phu hle niin an lo sawi chamchi ve tho bawk a ni.