Aizawl: Mizoram State Commission for Women (MSCW)-in Tanhril nula vanduaina tawh chungchangah dan bawhchhiat theihna laka an fihlim theih nana thu vawrh darh zui tawh lo turin mipui an ngen.
Tun hnaia hmeichhe tual thihna chungchanga thuchhuah leh ngenna an siamah MSCW chuan, Tanhril-a thil thlengah National Commission for Women, Delhi-in Suo-Moto cognizance lain, hemi bawhzui hian MSCW chuan case hi a ngaihven zui reng a, Police te pawhin an tih tur tiin theihtawpin khawtlang puihnain hma an la a, boruak ralmuang tak karah chhui ni-a an hriat thu an sawi a.
Police Press Statement chhuah hnu, January 27, 2026 atang erawh boruak a danglam ta a, vanduaina tawka thi ta, Tanhril nula leh a chhungte bakah, a mipa kawppui nia ngaih thi ta nupui fanaute zahawmna humhim chu MSCW chuan tul a ti a. Zoram mipui zawng zawngte pawh, hnu chhuitu Police leh Court-ah rinna nghat ngam tura ngenin, Tanhril nula vanduaina tawh chungchangah hmeichhiate zahawmna tibawrhban zui thei tur zawnga video siam, video re-act, post leh comment lo siam zung zung lo tur leh, dan bawhchhiat mai theihna laka an filhlim theih nan thu vawrh darh zui tawh lo turin an ngen.
Hnuhma thar leh finfiahna thar an nei a nih pawhin dan anga hnu chhuitute hriattir zawk a, social media lama comment mawi lo tak tak awm zui theihna tur ang zawnga thil ti tawh lo turin an ngen bawk.