Aizawl: Reliance Foundation chuan nimin chawhnu khan Central YMA hnenah ruihhlo dona atana hman tur, 4X4 Camper pakua an hlan.
Formosa Foundation-in Reliance Industries Ltd kaltlangin lirthei a hlante hi Mizorama YMA Sub-hqrs zawng zawng (9)-te tan a an pek a ni a. Lirthei hlanna hi Tuikhuahtlanga Central YMA Hall-ah neih a ni.
Lirthei hlanna hun hi Central YMA President R.Lalngheta’n a kaihruai a. Central YMA Gen. Secretary Prof. Malsawmliana’n report pein, Formosa Chairman Jonathan Lalremruata’n lirthei hlan tur lo pian chhuah dan a sawi.
Jonathan Lalremruata chuan Reliance hotu, Anand Ambani nen December 8, 2025-a Jamnagar-a an inkawm tumin Mizoram tan engnge an tihsak theih a zawhin Central YMA hotute chu ram tana tangkai an mamawh a zawh hnuah ruihhlo do nana heng 4×4 Camper an mamawh hle thu an hrilh angin tun dinhmun an thleng ta tih a sawi.
Formosa Foundation hna lo thawh tawh dan sawiin Covid-19 lai khan Mizoramah din a nih thu a sawi a. Mizoram tan hmalakna hrang hrang an neih thin thu te, hripui len laia Central YMA nen tangkawpa ei leh bara harsa chhungkaw 14,192 tana ration an sem bakah ventilator, oxygen concentrator, PPE, mask leh school bus te mipuite hnenah an lo pek tawh thu a sawi.