A changin a tal hiar viau a, han chet kawihsawih chang lah a ngah, mahse a duhawm reuh thin em avangin mi tam tak ngainat leh duh rawn a la hlawh tho tho a, vawiin thlengin chanchin thar a la rawn nei ve zel e.
Britney Spears chuan an chhungkaw buaina hrang hrang awm thin chu a reh fel tak thu leh mi vannei tak a nih thu a IG lamah a rawn puang chhuak.
Kum 44 mi zaithiam hian nilaini khan mahni chauh inngaihtuah a that lohzia thu rawn sawichhuakin, mihring kan nih chuan midangte nen inzawmna tha kan nei tur a ni, a ti a. Chhungkua phei chu inngeih leh inpawh tak, inzawmna thuk tak nei tur kan lo ni, a ti bawk.
Theihnghilh theih loh tam tak i nei ngei ang, mahse ngaihdam theihna hi a hlu ber zel a, ka chunga Pathianin a remruat dan hi a mak hle, a ti zui bawk.
Britney te chhungkua hi an buai rei ve nak nak hle mai a, inpawh lo taka awmin, vantlang hmaah an inchachhuah nasa thin hle. Mahse, tunah erawh inngaihdam tawnna nen hun an hmang chho dawn ta niin a lang.